Ўзбекистон миллий терма жамоаси ФИФАнинг янгиланган рейтингида бир поғона юқорилаб, 54-ўринга кўтарилди. Бу натижа орқали жамоа Осиёда кучли олтиликка кириб, минтақада ўз позициясини янада мустаҳкамлади.
ФИФА 18 сентябр куни эълон қилган янгиланган рейтингда ўзбекистонлик футболчилар 1453,31 очко билан қайд этилди. Жамоа сўнгги икки ой давомида 4,19 очко тўплаб, натижаларини яхшилаган. Бу жараёнда терма жамоа CAFA Nations Cup мусобақасида чемпионликни қўлга киритиб, ўз мавқеини мустаҳкамлади.
Турнир давомида Ўзбекистон Туркманистонни 2:1, Қирғизистонни эса 4:0 ҳисобида мағлуб этган, Ўмон билан 1:1 ҳисобида дуранг қайд этди. Финалда эса Эрон устидан 1:0 ҳисобидаги муҳим ғалабага эришди. Мазкур натижалар миллий терма жамоага халқаро майдонда катта нуфуз олиб келди.
Осиёда эса Ўзбекистон Япония (19-ўрин), Эрон (21-ўрин), Жанубий Корея (23-ўрин), Австралия (25-ўрин) ва Қатардан (53-ўрин) кейинги ўринда турибди. Ўзбекистондан сўнг эса Ироқ (58-ўрин) ва Саудия Арабистони (59-ўрин) жой олди.
Дунё рейтингида етакчиликни Испания қўлга киритди, Франция иккинчи, Аргентина эса учинчи ўринга тушди. Кучли ўнликдан Англия, Португалия, Бразилия, Нидерландия, Бельгия, Хорватия ва Италия ўрин олган.