18 сентябр куни Лондонда бўлиб ўтган матбуот анжуманида АҚШ президенти Доналд Трамп Россия президенти Владимир Путинни танқид қилди. Унинг таъкидлашича, Путин унинг умидларини пучга чиқарган.
«У ҳафсаламни пир қилди. У кўп инсонларни ўлдирмоқда ва ундан-да кўпроғини йўқотмоқда. Ростини айтсам, Россия аскарлари украиналикларга нисбатан кўпроқ ҳалок бўлаяпти», — деди Трамп.
Матбуот анжуманида Трамп Британия Бош вазири Кийр Стармер билан иштирок этди. Улар Украинага қўшимча ёрдам йўлларини муҳокама қилган.
Трампнинг яна бир бор таъкидлашича, агар у президент бўлганида, Украина уруши бошланмаган бўларди.
«Бу урушда миллионлаб одамлар, миллионлаб жонлар ҳалок бўлди. Бу америкалик аскарлар эмас. Бундай тезликда инсон йўқотишлар Иккинчи жаҳон урушидан бери кузатилмаган. Шу боис мен буни тўхтатишга мажбурман», — деди у.
Трамп, шунингдек, Украина президенти Володимир Зеленский билан Оқ уйда ўтган учрашувни эслаб ўтди. Унинг сўзларига кўра, у ўшанда ҳам бу можаро катта урушга айланишини олдиндан кўрган.
«Бу можаро учинчи жаҳон урушига айланиши мумкин эди. Лекин менимча, биз ҳозир бундан узоқлашдик. Аммо бу шунга олиб бораётган эди. Бу фожиа», — дея хулоса қилган Трамп.