19 сентябр куни Оқ уйда эълон қилинган қарорга кўра, компаниялар H-1B визаси асосида ишлаётган ҳар бир ходим учун олти йилгача йилига ушбу тўловни амалга ошириши керак бўлади.
Бу ўзгаришлар Америка тарихидаги кўплаб иқтисодий қатламлар учун очиқ бўлган анъанавий иммиграция сиёсатидан кескин чекиниш ҳисобланади. Ҳуқуқшунослар янги тартиб «визалар дастурини амалда йўқотиши» мумкинлигини таъкидлаб, АҚШ иқтисодиёти учун жиддий оқибатларга олиб келишидан огоҳлантирмоқда, деб хабар берди Bloomberg.
Савдо вазири Ховард Лутникнинг таъкидлашича, мазкур қарорнинг мақсади америкалик ишчилар учун иш ўринларини кенгайтиришдир. «Ёки бу шахс компания ва Америка учун жуда қимматли бўлади, ёки у кетади ва компания америкаликни ёллайди», — деди у. Оқ уй ҳужжатларида айтилишича, бу тартиб америкалик ишчиларни қўллаб-қувватлашга қаратилган. Арзон ишчи кучи орқали маҳаллий ходимлар ўринларидан маҳрум бўлмоқда ва бу миллий хавфсизликка таҳдид сифатида баҳоланмоқда. Бироқ, ҳуқуқий баҳслар, Конгресс қаршилиги ва халқаро компанияларнинг офисларни четда очиши эҳтимоли янги ташаббусларнинг амалга ошишига жиддий тўсиқ бўлиши мумкин.
H-1B визаларига энг кўп таянадиган йирик компаниялар орасида Amazon, Microsoft, Meta, Apple, Google, JPMorgan Chase ва Walmart каби корпорациялар бор. Масалан, Amazonда бу визада ишлаётган 10 мингдан зиёд ходим мавжуд. Янги тартиб уларнинг ишчи кучини жалб қилиш имкониятига салбий таъсир кўрсатиши мумкин.
Ҳуқуқшунос Дэвид Леополднинг фикрича, 100 минг долларлик тўлов H-1B дастури фақат улкан молиявий имкониятга эга кишилар учунгина очиқ бўлади. Айрим рекрутинг компаниялари эса бу сиёсатни «Американинг глобал талант бозорида рақобатбардошлигини сусайтирувчи» қарор сифатида баҳолади.