АҚШ президенти Доналд Трампнинг махсус вакили, генерал Кит Келлог Украина–Россия урушидаги мураккаб вазият юзасидан The Telegraph нашрига интервю берди. Унга кўра, Украина ҳозирча Россия назоратида бўлган ҳудудларни тан олишига тўғри келиши мумкин.
Келлог таъкидлашича, қарор қабул қилиш фақат президент Володимир Зеленский ҳуқуқида. «Америка украин ерларини савдо объекти сифатида кўрмайди. Бу қарорни Украина раҳбари ўзи қабул қилиши лозим», — деди у.
Генерал Украина раҳбариятини узоқ муддатли манфаатларни ўйлаб ҳаракат қилишга чақирди. «Ҳозир реаллик шундайки, сизга керак бўлган ҳудудлар оккупация қилинган. Аммо узоқ муддатда уларни қайтариш мумкин. Ўйинни узоқ муддатга режалаштиринг», — деди у.
Кит Келлог, шунингдек, Доналд Трамп Россия–Украина урушининг ҳал бўлмасдан қолишига норози эканини айтди. Генерал эса хушфеъллик билан вазият тинч йўл билан ҳал бўлишига ишончи борлигини билдирди. Бироқ у Трампдан фарқли равишда, аввал ўт очишни тўхтатиб, сўнг музокара ўтказиш тарафдори эканини айтди.
У вазиятни 1940 йилда совет иттифоқи Латвия, Литва ва Эстонияни ўзига қўшиб олганига таққослади. «Биз ҳеч қачон СССРнинг Болтиқ мамлакатлари устидан назоратини тан олмаганмиз, гарчи улар де-факто иттифоқнинг бир қисми бўлса ҳам… Бу ерда ҳам худди шундай бўлади»,— деди Келлог.
«Ўт очиш тўхтамас экан, тинчликка эришиш мушкул. Путин ўзини ғолиб деб ҳис қилаётган экан, у музокарага тайёр эмас. Трамп аввал музокара, кейин тўхташи тарафдори. Мен эса аввал ўт очиш тўхташи керак, деган фикрдаман», — деди Келлог.
Аввалроқ АҚШ вице-президенти Жей Ди Вэнс ҳам тинчлик музокаралари асоссиз кечаётганини таъкидлаган ва асосий масала — ҳудудлар тақдири ҳамда хавфсизлик кафолатлари эканини айтганди. Россия президенти Путин кафолатлар муҳокама этилади, улар ҳурмат қилинади, деган. Зеленский эса ҳозирча ҳеч қандай юридик тан олиш бўлмаслигини билдирган.