Middle East Eye манбасига кўра, Қоҳира 1950 йилги Қўшма мудофаа тўғрисидаги шартнома асосида ташқи таҳдидларга қарши арабча НАТОга ўхшаш иттифоқ тузишни таклиф этган. Аммо Қатар ва БАА бу ташаббусни рад этди. Ташкил этиладиган иттифоқ Исроилга қарши эҳтимолий ҳимоя механизмларидан бири бўлиши керак эди.
Баёнотлар таҳлилига кўра, асосий баҳс иттифоқдаги етакчилик бўйича юзага келган. Саудия Арабистони қўмондонликни ўз зиммасига олмоқчи бўлган, аммо Миср ўзининг кўп йиллик ҳарбий тажрибасини асос қилиб, етакчиликка даъвогарлик қилган.
Миср президенти Абдулфаттоҳ ас-Сисий саммитни «хафсаласи пир бўлиб» тарк этгани айтилмоқда. Қоҳира Исроилнинг Ғазодаги ҳаракатларини геноцид деб аташ ва фаластинликларни Синай яриморолига кўчиришга қарши қатъий баёнот кутаётган эди.
БАА ва Қатар эса «АҚШ президенти Доналд Трамп вазиятни барқарорлаштириши ва Бинямин Нетаняҳунинг бошқа араб давлатларига нисбатан ҳам шундай ҳужумлар уюштиришининг олдини олишига» ишонмоқда.
Қолган араб давлатлари Исроилга қарши фаол ҳаракатлар самара бермаслигини англаб етган ва АҚШ орқали Исроилга босим ўтказишни афзал кўрмоқда.