29 август куни тадбиркорлар билан ўтказилган очиқ мулоқотда ўзини бир нечта қурилиш компаниялари раҳбари сифатида таништирган Усмонжон Абдусамадов «Тошкентда битта уй учун 200 минг долларгача харажат бор» деган даъво билан чиққан эди. Вазирлик бунга жавобан жараёнлар рақамлаштирилгани, коррупция хавфлари минималлаштирилгани ва ортиқча маблағ талаб қилиш амалда истисно этилишини айтиб изоҳ берганди.
Энди эса вазирлик тадбиркорга нисбатан чора кўришни сўраб, Ички ишлар вазирлигига мурожаат йўллади. Бу ҳақда вазирлик матбуот хизмати хабар берди.
Мурожаатда сабаб сифатида тадбиркорнинг гаплари соҳага оид ислоҳотлар ҳамда вазирликнинг обрў-эътиборига салбий таъсир кўрсатгани, бу эса ўз навбатида вазирлик ва унинг тизимида фаолият юритаётган ходимларнинг шаъни, қадр-қиммати ва ишчанлик обрўсига путур етказгани айтилмоқда. Шу боис Абдусамадовга нисбатан белгиланган тартибда жавобгарлик чоралари кўришни сўраб, Ички ишлар вазирлигига ариза юборилган.
Вазирлик қурилиш соҳасида барча давлат хизматлари белгиланган тартибда электрон тизим орқали амалга оширилишини, қўшимча маблағ талаб қилиш қатъий тақиқланганини эслатди. Аризалар фақат Ягона давлат хизматлари портали ёки Давлат хизматлари марказлари орқали қабул қилинади, тўғридан-тўғри мулоқотга йўл қўйилмайди.
Ҳамма жараёнлар — рухсатнома олишдан тортиб, объектни фойдаланишга қабул қилишгача — «Шаффоф қурилиш» ахборот тизимида назорат қилинади. Бу тартиб 2022 йил 20 апрелдаги Вазирлар Маҳкамасининг 200-сон қарори билан тасдиқланган маъмурий регламентлар асосида амалга оширилмоқда.