Financial Times манбаларига кўра, Европа Иттифоқи Россияга қарши янги санкциялар тўпламини қабул қилиш учун Будапештнинг розилигини таъминлашга ҳаракат қилмоқда. Бунда асосий восита сифатида — аввал музлатилган маблағларни ечиб бериш таклифи қўлланилмоқда.
Еврокомиссия 2022 йилда Венгрия учун ажратилган 22 млрд еврони инсон ҳуқуқлари, суд мустақиллиги ва ЛГБТ ҳуқуқлари бўйича танқидлар туфайли тўсиб қўйган эди. 2023 йилда мамлакат 10 млрд еврони қайтариб олиб, эвазига Украинага 50 млрд евро ёрдамни тўсмасликка рози бўлган. 2025 йилда эса Венгрия 157 млн еврони ҳуқуқий механизмлар орқали қўлга киритган.
Энди Брюссел Будапештга яна 550 млн евро беришни кўзламоқда. Бу маблағ санкцияларнинг 19-тўплами қабул қилиниши учун муҳим воситага айланиши мумкин. Янги пакетда Россия банклари, энергетика компаниялари ва криптовалюта операцияларига қарши чоралар, шунингдек, «хуфиёна флот»га тегишли 118 та янги кемани санкциялар рўйхатига киритиш назарда тутилган.
Энг муҳими, 2027 йилгача Россиядан суюлтирилган газ импортини тўлиқ тугатиш мақсади ҳам ушбу пакетга киритилган.
Шу тариқа, Европа Иттифоқи бир овоздан қабул қилиниши шарт бўлган санкциялар юзасидан Венгриянинг вето ҳуқуқини моддий йўл билан чеклашга ҳаракат қилмоқда.