21 сентябр куни Суриянинг ўтиш даври президенти Аҳмад аш-Шаръа БМТ Бош Ассамблеясининг 80-юбилей анжуманида иштирок этиш учун АҚШ пойтахти Вашингтонга етиб келди. Syria TV маълумотига кўра, бу 1967 йилдан буён илк марта Сурия раҳбарининг АҚШга ташрифидир.
Аш-Шаръанинг сафари беш кун давом этади, унга тўртдан ортиқ вазир кирган делегация ҳамроҳлик қилмоқда. У якшанба куни кечқурун АҚШдаги сурияликлар билан учрашади.
Ташриф доирасида Сурия ва АҚШ ўртасида дипломатик алоқаларни тиклаш, шу жумладан Вашингтонда элчихона очиш масаласи муҳокама қилиниши кутилмоқда. Шунингдек, Аш-Шаръа БМТ минбаридан янги Сурия ҳақида ўз қарашларини баён этади.
Аш-Шаръа 2025 йил январда Башар Асад режими ағдарилгандан сўнг мамлакат раҳбари бўлган. У «Ҳайъат Таҳрир аш-Шом» гуруҳини бошқарган бўлиб, режимни ағдаришда ҳал қилувчи рол ўйнаган. Башар Асад оиласи билан Россиядан паноҳ топган, Москва эса янги ҳукумат билан алоқаларни сақлаб қолган.
Май ойида АҚШ президенти Доналд Трамп Аш-Шаръа билан Саудия Арабистонида учрашган эди. CNN хабар беришича, учрашув «барча жиҳатдан ижобий ўтган». Кейинроқ Трамп Суриядан санкциялар олиб ташланишини эълон қилиб, «унга буюкликка интилиш имконияти берилиши»ни айтди.
Эътиборлиси, 2013 йилдан Аш-Шаръа АҚШнинг «энг хавфли террорчилар» рўйхатида эди, уни қўлга олиш учун 10 млн доллар мукофот белгилаб қўйилганди.