Фаластиннинг ҲАМАС ҳаракати АҚШ президенти Доналд Трампга Ғазода 60 кунлик сулҳни кафолатлашни сўраб мактуб йўллаган. Бунинг эвазига улар гаровга олинганларнинг ярмини озод қилишни ваъда қилган. Бу ҳақда Fox News телеканали Трамп маъмуриятининг юқори лавозимли амалдорига таяниб хабар берди.
Fox News телеканалининг босиб олинган Қуддусда фаолият юритаётган бош хорижий мухбири Трей Йингст шундай ёзди: «ҲАМАС президент Трампга Ғазода 60 кунлик танаффусни шахсан кафолатлашни сўраб хат йўллади. Бунинг эвазига улар гаровга олинганларнинг ярмини дарҳол озод қилишни таклиф қилишмоқда».
Ҳозирча Фаластин ҳаракати томонидан имзоланмаган, бироқ яқин кунларда имзоланиши кутилаётган хат Қатарда сақланмоқда. Channel 12 ва Fox News хабар беришича, ушбу мактуб шу ҳафта охирида АҚШ президентига топширилади.
Қатар сентябройи бошида Исроилнинг Форс кўрфази мамлакатига қарши тажовузидан сўнг қолган 48 нафар исроиллик асирни алмашиш бўйича келишув учун воситачилик ҳаракатларини тўхтатди. Қатар пойтахтига берилган зарба халқаро миқёсда, жумладан Россия ва Украина томонидан қораланди, шунингдек музокаралардаги кескинликни янада кучайтирди.
ҲАМАСнинг таклифи Қатар, Миср ва АҚШ каби воситачиларнинг аввалги ташаббусларига мос келади.
Шу билан бирга, Исроилнинг Ғазо шаҳарларига қарши ҳарбий кампанияси қайта бошланиши фонида сўнгги 24 соат ичида қамал қилинган ҳудуддаги касалхоналарга 61 нафар ҳалок бўлган ва 220 нафар янги ярадор келтирилди. 2023 йил 7 октябрдан буён Исроил агрессияси қурбонларининг умумий сони 65 344 кишини ташкил этиб, 166 795 киши яраланган.