«Коррупцияга қарши курашиш соҳасида фуқаролик жамияти институтларининг иштирокини янада кенгайтириш ва илмий тадқиқотларни қўллаб-қувватлаш чора-тадбирлари тўғрисида»ги Президент қарорига (ПҚ–288-сон) кўра, БМТнинг Коррупцияга қарши конвенцияси бажарилишини мониторинг қилишда нодавлат нотижорат ташкилотлар иштирок этади ва улар томонидан мустақил баҳолаш тизими йўлга қўйилади.
Шунингдек, 2025 йилдан бошлаб нодавлат ташкилотларнинг коррупцияга қарши йўналишдаги лойиҳалари учун ҳар йили 10 млрд сўм грант ажратилади. Маблағлар Фуқаролик жамияти институтларини қўллаб-қувватлаш жамоат фонди иқтисод қилинган маблағлари ва коррупцияга қарши агентлик томонидан «қониқарсиз» деб топилган давлат органларининг бюджетдан ташқари маблағлари ҳисобидан молиялаштирилади.
Агентликнинг ижтимоий буюртмаси асосида аҳоли орасида сўровлар ўтказилиб, маиший коррупция ҳолатларини келтириб чиқараётган омиллар ўрганилади. Ҳар йили 1 апрелгача ННТлар лойиҳалари ва уларни молиялаштириш бўйича таклифлар Миллий кенгашга киритилади.
Шунингдек, «Юксалиш» ҳаракати, «Ижтимоий фикр» маркази ва ННТлар миллий ассосиацияси ҳамкорлигида Коррупцияга қарши курашиш бўйича минтақавий тадқиқот маркази ташкил этилади. Марказнинг асосий вазифаларидан бири аҳолининг, айниқса ёшларнинг коррупцияга қарши курашда фаоллигини ошириш ва жамиятда бу иллатга нисбатан муросасиз муносабатни шакллантиришдир.
Маълумот учун, 2024 йилда республика бўйича 4 649 та иш судда кўрилган бўлиб, 7 354 киши коррупцияга оид жиноятлар учун жавобгарликка тортилган. Судланганлар сони бўйича Андижон вилояти биринчи ўринда қайд этилди.