«World Cleanup Day» доирасида Ўзбекистоннинг барча ҳудудларида «Ҳаёт учун жой ажратинг» шиори остида йирик экологик тадбир ўтказилди. Экология, атроф-муҳитни муҳофаза қилиш ва иқлим ўзгариши вазирлиги, Чиқиндиларни бошқариш агентлиги ҳамда қатор компаниялар ҳамкорлигида амалга оширилган акцияда жами 55,7 тонна чиқинди йиғилди. Бу ҳақда Экология вазирлиги ахборот хизмати хабар берди.
Тошкент денгизи соҳилида ҳам тозалаш ишлари ўтказилиб, 962 кг чиқинди йиғилди. Шунингдан 200 кг пластик алоҳида ажратилиб, қайта ишлашга йўналтирилди. Жамоалар ўртасидаги беллашувда Ўрмон хўжалиги агентлиги биринчи, «Ёш экологлар» иккинчи, Тошкент вилояти «Тоза ҳудуд» корхонаси эса учинчи ўринни эгаллади.
Тадбирда вазирлик ва агентлик мутасаддилари, маҳаллий идоралар, ёшлар ва эко-фаоллар қатнашди. Уларнинг таъкидлашича, чиқиндилар муаммоси иқлим ўзгариши ва биоҳафликнинг йўқолишига олиб келмоқда. Ўзбекистонда ҳар куни ўртача 19-20 минг тонна чиқинди ҳосил бўлиб, 2024 йилда жами 14 млн тонна чиқиндидан атиги 5,2 фоизи қайта ишланган.
Шу муносабат билан Чиқиндилар агентлиги раҳбари Шарифбек Ҳасанов чиқиндиларни тўғри бошқариш зарурлигини таъкидлади. Унинг фикрича, эко-ташаббуслар орқали жамоатчилик онгини ўзгартириш ва чиқиндилар ҳосил бўлишини қисқартириш мумкин.
Бу йилги кўрсаткич ўтган йилги 36,5 тоннали натижадан икки баробарга яқин юқори бўлди. Мутасаддиларнинг фикрича, бу каби тадбирлар чиқиндиларни асл иқтисодий ресурс сифатида кўришга хизмат қилиб, айланма иқтисодиёт ривожига туртки беради.