Аввалроқ Франция президенти Эммануэл Макрон дунёнинг ўнта давлати — Франция, Буюк Британия, Канада, Белгия, Австралия, Португалия, Малта, Люксембург, Андорра ва Сан-Марино — БМТ саммити доирасида биргаликда Фаластинни тан олишга келишиб олганини таъкидлаган эди. Бироқ Канада, Австралия ва Буюк Британия БМТ Бош ассамблеяси сессиясини кутмасдан Фаластинни тан олганини эълон қилган эди. Булар сафига Португалия ҳам қўшилди.
Макронга Фаластин мухторияти раиси Маҳмуд Аббос билан суҳбатда ўз позициясини шахсан тасдиқлаганини билдирди.
Франция президенти бу қадамни минтақа учун комплекс тинчлик режасининг бир қисми сифатида таърифлади. Унга кўра, бу израилликлар ва фаластинликларнинг хавфсизлик ҳамда тинчликка бўлган интилишларини таъминлашга қаратилган. Макрон «Фаластин давлатини тан олиш орқали икки давлат концепцияси амалга ошишига туртки бериш мумкин» деб таъкидлади.
Politico манбасига кўра, Исроил бу қарорга жавоб чоралари тайёрламоқда. Улар орасида Ғарбий соҳилда аннексия жараёнларини тезлаштириш ва Қуддусда Франция консуллигини ёпиш каби чоралар бор.
Исроил бош вазири Бинямин Нетаняҳу Фаластин давлатини тан олиш Исроилнинг мавжудлигига таҳдид солиши мумкинлигини билдирди. Нетаняҳу бир неча давлатлар томонидан Фаластиннинг тан олинишига расмий жавоб келгуси ҳафтада берилишини таъкидлади. У шунингдек, Фаластин давлати «ҳеч қачон тузилмайди», деди.
Ҳозиргача БМТга аъзо 193 та давлатдан 151 таси Фаластин мустақиллигини тан олган. Бироқ Исроил ва АҚШ ҳалигача бунга қарши чиқмоқда. Бу иккисидан ташқари тан олмаган йирик давлатлар ичида Германия, Италия, Швейцария, Австрия, Финландия, Дания, Нидерландия, Белгия, Болтиқбўйи давлатлари, Хорватия, Косово, Шимолий Македония ва Греция кабилар бор.
Лотин Америкасида ягона Панама, Африка қитъасида давлат Камерун ва Эритрия, Осиё қитъасида эса Мянма, Япония, Жанубий Корея ва Тайван Фаластинни тан олмаган. Собиқ иттифоқ давлатлари ичра фақат Молдова иккиланиб турибди. Россия ва Украина ҳам Фаластинни тан олган.
Ўтган ҳафта БМТ Бош ассамблеяси аксарият овоз билан Фаластин муаммосини тинч йўл билан ҳал этиш ва икки давлат ечимини амалга ошириш ҳақида декларация қабул қилган эди.