S&P Global таҳлилий компанияси маълумотларига кўра, бугунги кунда Россиянинг «хуфиёна флоти»га дунё бўйлаб ҳаракатланаётган нефть танкерларининг 17 фоизи киради. New York Times нашрининг ёзишича, бу жаҳондаги ҳар олтинчи танкер дегани.
2025 йил бошидан флот деярли икки баробарга ўсиб, 940 тага етди. Улар асосан 20 йилдан ортиқ хизмат муддатига эга эски кемалар бўлиб, бутун дунёда нефт ташувчи танкерларнинг ўртача ёши 13 йил атрофида.
Экспертлар таъкидлашича, бу кема паркларининг асосий хусусияти — суғурта ва тўлиқ техник хизмат кўрсатувнинг йўқлиги, мулкчилик схемаларининг ноаниқлиги. Бундан ташқари, танкерлар санкцияларни четлаб ўтиш учун портларга кирмайди, океан ўртасидаёқ нефтни бошқа кемаларга қуйиб беради ва геолокация маълумотларини сохталаштиради.
New York Times нашрининг қайд этишича, бу нафақат халқаро қонунларни бузиш, балки йирик экологик фожиалар хавфини ҳам кучайтиради. Чунки эски кемаларнинг техник ҳолати пастлиги нефт тўкилиши ва денгизда кенг миқёсли ифлосланишларга олиб келиши мумкин.
Айни пайтда Европа Иттифоқи, АҚШ ва Британия санкциялар ёрдамида Россия нефт флоти кема паркларининг ярмидан кўпроғини қамраб олди. Аммо таҳлилчилар таъкидлашича, «хуфиёна флот»нинг ҳозирги ўсиш суръати санкцияларнинг самарадорлигини сезиларсиз даражага тушириши мумкин.