АҚШнинг Ўзбекистон ва Қозоғистонда собиқ элчиси Дениэл Розенблум Йел университетидаги маърузасида Вашингтон Марказий Осиёдаги ахборот маконида ўз таъсирини йўқотганини билдирди. Унинг фикрича, бу ҳолат Россия ва Хитой учун катта имконият яратган. Бу ҳақда Yale Daily News хабар берди.
Розенблум 2019–2022 йилларда Тошкентда, 2022–2025 йилларда эса Остонада элчи лавозимида ишлаган. У «Ёлғон оқими билан кураш: Марказий Осиёдаги Россия дезинформациясига қарши туриш» номли маъруза ўқиган. Тадбирда 45 киши бевосита, яна 35 киши эса Zoom орқали қатнашган.
Дипломат 2023 йилда рус оммавий ахборот воситалари уни Қозоғистонда НАТО базаси очганликда айблаганини эсга олди. Аслида, эса у АҚШ маблағлари ҳисобига қурилган тинчликпарварлик институти конференция зали очилишида иштирок этган.
Розенблумнинг таъкидлашича, АҚШ элчихоналари соғлиқни сақлаш, қишлоқ хўжалиги ва таълим соҳасидаги ҳамкорлик орқали ёлғонларга қарши ҳаракат қилган. Аммо 2023 йилдан кейин бу йўналишдаги ишлар кескин камайди. Бунинг сабаби сифатида Давлат департаменти ходимларининг қисқартирилиши, USAID дастурларининг тўхтатилиши ҳамда «Америка овози» ва «Озодлик»га маблағ ажратилиши қисқаргани кўрсатилди.
Розенблум Хитойнинг «Бир макон, бир йўл» ташаббуси орқали Марказий Осиёдаги таъсири ортиб бораётганини ҳам қайд этди. Унинг фикрича, Пекин инфратузилма ва маданий алоқалар орқали минтақада кучли таъсир ўрнатмоқда.
«Энг катта муаммо ўзимизда. Агар АҚШ ўзини дунёдан ажратса, хавфсизлик ва фаровонлик йўқотилади», — деди дипломат.