Олий Мажлис Сенатининг бюджет ва иқтисодий масалалар қўмитаси раиси Эркин Гадоев Транспорт вазирлигига йўлларидаги тирбандликлар бўйича сенатор сўрови юборди. Бу ҳақда Олий Мажлиси Сенати ахборот хизмати хабар берди.
Сўровда пойтахтдаги йўлларда кузатилаётган муаммолар ва уларни бартараф этиш бўйича амалга оширилаётган ишлар ҳақида атрофлича маълумот талаб этилган.
Айниқса, ўқув йили бошланиши билан йўлларда ҳаракат кескин ортгани таъкидланди. Ҳатто айрим кунларда тирбандлик даражаси энг юқори 10 баллга етгани, бу эса ишга ва ўқишга кечикишлар, аҳоли вақти зое кетишига сабаб бўлаётгани қайд этилди.
Расмий маълумотларга кўра, ҳар куни 1 миллионга яқин киши пойтахтга ташриф буюради. Уларнинг қарийб 275 минг нафари Тошкент вилоятидан келиб-кетади. Бу ҳолат, айниқса, эрталаб ва кечқурун тирбандликларни янада кучайтираётгани айтилади.
Шунингдек, «Интеллектуал транспорт» тизими ҳолати, жамоат транспортини ягона агломерация тизимига ўтказиш жараёни ва президент томонидан белгиланган вазифаларнинг ижроси юзасидан ҳам маълумот сўралди.
Июл ойида президент Шавкат Мирзиёев шахсан ўзи машина ҳайдаб йўлда 15−20 дақиқа тирбандликларга дуч келганини айтиб, масъул идораларга бу муаммони ҳал қилиш топшириғини берган эди.