Европа комиссияси Россия нефт импортига нисбатан янги чоралар кўришга қарор қилди. Урсула фон дер Ляйеннинг маълумот беришича, Венгрия ва Словакияга импорт қилинадиган Москва нефт маҳсулотлари учун махсус бож ставкалари жорий этилади. Бу орқали уларни Россиядан ташқари манбалардан энергия излашга мажбур этиш кўзда тутилмоқда.
Полшанинг Rzeczpospolita нашрининг ёзишича, Европа Иттифоқи йил якунига қадар ушбу божларни жорий қилади. Фон дер Ляйеннинг таъкидлашича, айнан Венгрия ва Словакия Евроиттифоқнинг ҳозирча Россия нефт импортини тўхтатмаган ягона давлатлари бўлиб қолган ва шу йўл билан ҳали ҳам Москва бюджетига маблағ киритмоқда.
Европа Иттифоқи режасига кўра, Россия нефт импорти учун божлар «Дўстлик» нефт қувуридан ташиладиган маҳсулотларга татбиқ этилади. Бундай чора санкциядан фарқ қилади. Санкция чораларида Евроиттифоққа аъзо барча давлатларининг якдил розилиги талаб қилинса, савдо чораларини кўпчилик давлатлар қўллаб-қувватлаши ўзи етарли бўлади.
Ўтган ҳафта АҚШ президенти Доналд Трамп Европадаги иттифоқдошларини Россия нефт харидларини тўхтатишга чақирган эди. Унинг таъкидлашича, Москва Украинадаги можарода олаётган даромадларини айнан нефт орқали таъминламоқда.
Божларнинг жорий этилиши билан Венгрия ва Словакия нафақат қўшимча харажатларга дуч келади, балки энергия таъминотидаги янги манбаларни излашга ҳам мажбур бўлади. Бу эса Европа Иттифоқининг умумий энергетик хавфсизлик стратегияси доирасидаги муҳим қадам сифатида баҳоланмоқда.