Bloomberg агентлигининг ёзишича, Ҳиндистон расмийлари Доналд Трамп маъмуриятидан Эрон ва Венесуэла каби санкция остидаги мамлакатлардан нефт сотиб олишга рухсат беришни сўрамоқда. Ню Деҳли вакилларининг таъкидлашича, фақат шундай шароитдагина Россиядан нефт импортини сезиларли даражада қисқартириш мумкин бўлади.
Манбаларга кўра, бу масала АҚШга ташриф буюрган Ҳиндистон делегацияси томонидан қайта-қайта кўтарилган. Ҳиндистонликларнинг таъкидлашича, бир вақтнинг ўзида Россия, Эрон ва Венесуэладан нефт олишни тўхтатиш жаҳон бозорида нархларни кескин ошириши мумкин.
Музокаралар АҚШнинг Ҳиндистонга нисбатан қаттиқ тарифлар жорий қилганидан кейин бўлиб ўтди. Бу чора Ню Деҳлининг Россия нефти билан савдоси учун жазо сифатида киритилган эди. Шунга қарамай, мамлакат ҳали ҳам Москвадан арзон нефтни сотиб олишда давом этмоқда. Ҳиндистон савдо вазири Пиюш Гоял эса Ню Йоркда мамлакат АҚШдан нефт ва газ импортини кўпайтириш ниятида эканини билдирди.
Россия Украинадаги уруш сабаб кўплаб харидорларини йўқотгач, нефтни арзонлаштиришга мажбур бўлган эди. Ҳиндистон эса бу имкониятдан кенг фойдаланиб, импорт харажатларини қисқартирди. Чунки мамлакат нефт эҳтиёжининг қарийб 90 фоизини ташқи бозордан қоплайди.
Эслатиб ўтамиз, Ҳиндистон 2019 йилда Эрон нефтасини сотиб олишни тўхтатган, бу йил эса йирик хусусий компания Reliance Industries АҚШ санкциялари кучайганидан сўнг Венесуэладан воз кечган эди. Аммо Яқин Шарқ нефтига тўлиқ ўтиш Ню Деҳли учун анча қимматга тушиши мумкин. Ҳиндистон Савдо вазирлиги маълумотига кўра, июл ойида Россия нефти баррелига ўртача 68,9 доллар бўлган. Саудия нефти 77,5, Америка нефти эса 74,2 доллар турди.