АҚШ президенти Доналд Трамп TikTok бўйича муҳим қарор қабул қилди. 25 сентябрь куни у ҳужжатга имзо чекиб, иловани блоклаш ўрнига унинг назоратини америкалик инвесторлар қўлига ўтказди, деб хабар бермоқда Оқ уй.
Компания 14 млрд долларга баҳоланган. Вице-президент Жей Ди Вэнс таъкидлашича, энди TikTok «америкаликларга қарши тарғибот қуроли сифатида» ишлатилмайди. Унинг сўзларига кўра, янги битим АҚШ қонунлари талаб қиладиган шахсий маълумотлар хавфсизлигини таъминлайди.
«Эндиликда америкаликлар TikTok’дан аввалгидан ҳам кўпроқ ишонч билан фойдаланиши мумкин. Албатта, биз бу йўналишда ишни давом эттирамиз», — деди Вэнс.
Битимда Oracle компанияси муҳим роль ўйнайди: АҚШдаги барча фойдаланувчи маълумотлари уларнинг булут инфратузилмасида сақланади. Шунингдек, TikTok’нинг видео тавсия алгоритми ByteDance назоратидан чиқарилиб, АҚШ ҳудудида қайта йўлга қўйилади.
Трампнинг айтишича, инвесторлар орасида Ларри Эллисон, Майкл Делл ва Мердоклар оиласи каби йирик миллиардерлар бор. Унинг таъкидлашича, «йўқотиб бўлмайдиган суммалар» ҳақида гап кетмоқда.
Эслатиб ўтамиз, январдан бери TikTok блокланиши ҳақидаги қарор бир неча марта кечиктириб келинган эди. Вашингтон Хитой назоратидаги иловани миллий хавфсизликка таҳдид сифатида кўрмоқда.