New York Post’нинг хабар беришича, президент Доналд Трампнинг Россияни «қоғоздан ясалган йиртқич» деб аташи янги разведка маълумотлари билан асосланмоқда. Унга кўра, Россия Украинага қарши уруш натижасида иқтисодий таназзул ва майдонда мағлубият сари тез ҳаракат қилмоқда.
АҚШ раҳбарининг фикрича, Украина барча вақтинча оккупация қилинган ҳудудларни қайтариб олиш имкониятига эга. Трампнинг бу баёноти, манбалар таъкидлашича, Россияни музокаралар столига ўтқазиш учун мўлжалланган сўнгги «стратегик қадам» ҳисобланади.
Президент маъмуриятига яқин манбанинг нашрга билдиришича, бу баёнот Вашингтон сиёсатининг сезиларли ўзгариши эмас, балки Кремлга босим ўтказишга қаратилган очиқ-ойдин музокара тактикасидир.
Украина президенти Володимир Зеленский эса 23 сентябр куни Трамп билан учрашувдан сўнг, аввалроқ Трамп Владимир Путиннинг «эртакларига ишонгани»ни эслатди. Аммо вақт ўтиши билан АҚШ етакчиси вазиятни тўлиқ англаб етгани ва Путин тарқатган маълумотлар майдондаги ҳақиқий ҳолатдан узоқ эканини тушунганини қайд этди.
«Ҳозир у менга анча кўпроқ ишонади», — деди Зеленский. Унга кўра, Трамп Россия ҳақидаги илгариги тасаввурини ўзгартириб, Киевнинг позициясини тўлиқроқ қабул қила бошлади.