АҚШ Давлат департаменти Колумбия президенти Густаво Петронинг визасини бекор қилди. Бу қарор у Ню Йоркдаги Таймс-сквер майдонида фаластинликларни қўллаб-қувватлаш акциясида қатнашиб, қаттиқ баёнотлар қилганидан сўнг қабул қилинди.
«Ғазода бўлаётган воқеалар — бу сўзнинг тўғридан тўғри маъносида геноцид. Бошқа изоҳ йўқ. Мақсад — фаластин халқини йўқ қилиш. Агар Фаластин йўқолса, инсоният ҳам йўқолади», — деди Петро ўз чиқишида.
Унинг айтишича, Америка ҳарбийлари ракета ҳужумлари орқали инсониятга қарши курашмаслиги керак. «Трампга итоат қилманг, инсониятга хизмат қилинг», — дея мурожаат қилди у АҚШ армиясига.
Вашингтон эса бу сўзларни «зўравонликка даъват» деб баҳолади. «Биз Петронинг визасини унинг беқарор ва иғвогар ҳаракатлари сабаб аннул қиламиз», — дейилган Давлат департаменти баёнотида.
Петро БМТ Бош Ассамблеясидаги нутқида ҳам Доналд Трампни «Ғазода геноцид содир этишда иштирокчи» деб атаган. Шунингдек, у АҚШнинг Кариб денгизи сувларида наркотик контрабандасига гумон қилинган кемаларга ракетали зарба бериши учун жавобгарликка тортишни талаб қилган.
Жорий йил январ ойида Трамп ҳокимиятга қайтгач, АҚШ ва Колумбия муносабатлари кескин ёмонлашди. Вашингтон Колумбия раҳбарининг сиёсатини икки давлатнинг стратегик иттифоқчилик алоқаларига салбий таъсир кўрсатмоқда, деб ҳисоблайди.