Британиянинг The Guardian нашрининг ёзишича, Россия иқтисодиёти уруш бошланганидан бери энг оғир даврни бошдан кечирмоқда.
Президент Доналд Трамп бу ҳафта Россия иқтисодиёти коллапс остонасида эканини ва Украина ўз ҳудудларини қайтариш имкониятига эга бўлганини таъкидлади.
Россияда устуворлик ҳануз ҳарбий харажатларга берилаётган бўлса-да, уларнинг ўсиши бюджет дефицитини янада кучайтираётир. 2025 йилнинг январ–июл ойларидаёқ дефицит режадан ошиб кетди, 2026 йилгача эса тахминан 4,6 трлн рублга етиши кутилмоқда. Миллий фаровонлик фонди захираларининг икки уч қисми аллақачон сарфланди.
Бюджетни тўлдириш мақсадида ҳукумат ҚҚС ставкасини 20 фоиздан 22 фоизга кўтармоқда. Бу эса аҳолининг тўғридан тўғри урушни молиялаштираётганини англатади. Ҳозирда бюджет харажатларининг 40 фоизи фронтга йўналтирилмоқда. Шу билан бирга, ЯИМ ўсиши прогнози 1 фоиздан пастга туширилди. «Сбербанк» раҳбари Герман Греф мамлакат «техник стагнация»га кирганини очиқ тан олди.
Урушнинг дастлабки икки йилида иқтисод ҳарбий ишлаб чиқариш ҳисобига ўсганди — рекорд иш билан таъминланиш ва маошларнинг ўсиши кузатилган. Бироқ иқтисодчиларнинг фикрича, Москва ҳар йили ҳарбий харажатларни 30 фоизга кўтариш имкониятига эга эмас.
Санкциялар туфайли Россия экспортини Хитой, Ҳиндистон ва Туркияга бурди. «Хуфиёна флот» танкерлари ва Туркия, БАА ҳамда собиқ совет ҳудудлари орқали параллел импортдан фойдаланилмоқда.
Украина дрон ҳужумлари эса нефт қайта ишлаш заводларида катта узилишларга сабаб бўлди. Августдан бери 38 заводдан 16 таси зарарланган, дизель нархи кўтарилди ва заправкадаги узун навбатлар Москвагача етиб келди.
Энди энг катта савол очиқ қолмоқда: иқтисодий қийинчиликлар Путинни Украинадаги режаларини ўзгартиришга мажбур қиладими?