Bloomberg нашри маълумотига кўра, OpenAI ходимлар улушларини сотиш жараёнидан сўнг компаниянинг умумий қиймати 500 млрд долларга етди. Бу кўрсаткич SpaceX’нинг (400 млрд доллар) баҳосидан юқори.
OpenAI ва бош директор Сэм Алтман бошчилигидаги жамоа Nvidia каби йирик технология компаниялари қаторида глобал сунъий интеллект инфратузилмасини қуриш ва СИ сервислар яратиш бўйича етакчи ҳисобланмоқда. Лойиҳага триллионлаб доллар сарфланиши кутилмоқда.
OpenAI 2015 йилда Сэм Алтман ва Илон Маск томонидан тузилган. Маск 2018 йилда директорлар кенгашини тарк этди ва 2023 йилда ўзининг xAI стартапини очди. Кейинги йилларда Маск ва OpenAI ўртасида тўқнашувлар кучайди. 2024 йилда у компанияга қарши суд иши очиб, OpenAI Microsoft’нинг ёпиқ кодли қўшма компаниясига айланди, деб танқид қилди.
Август ойида xAI Apple ва OpenAI’ни ChatGPT’ни iPhone операцион тизимига интеграция қилиш масаласи бўйича судга берди. Маскнинг компанияси бу қарор рақобат ва инновацияларга тўсқинлик қилаётганини билдирди.
Сентябрда OpenAI Oracle билан беш йиллик ҳамкорлик тўғрисида шартнома имзолаб, 300 млрд долларлик ҳисоблаш қувватини харид қилди. Бу тарихдаги энг йирик булутли шартномаларидан бири бўлди. Шу фурсатда Oracle асосчиси Ларри Эллисон дунёнинг энг бой инсонларидан бирига айланди.
Аввалроқ Сэм Алтман нейрон тармоқлар инсонлар бажара олмайдиган кашфиётларни амалга ошириши, сунъий интеллект 2030 йилга келиб инсон қобилиятидан ошиб кетишини таъкидлагани ҳақида хабар берган эдик.