Президент Россияси Владимир Путин «Валдай» халқаро мунозара клубининг Сочидаги йиғилишида нутқ сўзлаб, ҳозирги глобал жараёнларнинг тезкор ўзгариши ҳақида гапирди. «Ҳамма нарса жуда тез ўзгаряпти, ҳар қандай ҳолатга тайёр бўлишимиз керак», деди у.
Путиннинг таъкидлашича, дунёда энди бирор бир давлат «ҳаммани бошқарадиган қудрат» сифатида қолмаган. У Ғарбнинг Россияни изоляция қилиш уринишларини «фиаско» деб атади: «Россия дунёга босимларга нисбатан беқиёс бардош кўрсатди, бу бутун бир коалицияни ҳам йиқита оларди».
Путин ғарб гегемонияси уринишларига рус мақола билан жавоб берди: «ломга қарши приём йўқ, бошқа ломдан ташқари».
У санкциялар масаласига ҳам тўхталди. Россия, унинг сўзларига кўра, рекорд даражада жазо чораларига дучор бўлган, аммо барча уринишлар самарасиз бўлган.
«Россияни чиқариб юборишни исталган жаҳон тизимининг ўзи Россияни қўйиб юбора олмаяпти. Чунки жаҳон мувозанати бизнинг мамлакатсиз тизила олмайди. Ғарб тинчланиши, ён-атрофга разм солиши, ҳақиқий ҳолатни англаб етиши ва муносабатларни бутунлай бошқача қуриши керак», — деди Путин.
СССР ва кейинчалик Россия икки марта НАТОга аъзо бўлишга тайёрлигини билдиргани, аммо ҳар икки уриниш ҳам рад этилгани ҳақида эслатди. «Россия НАТОга ҳужум қилади, деган иддаоларга кимдир ишонишига ақл бовар қилмайди. Агар чиндан ҳам ишонишса, демак, улар лаёқатсиз», деди Путин.
Шу билан бирга, у АҚШ ва Европа элиталарини «жазава қўзғатишда» айблади ва «улар ўзларининг ултрасўл маргинал ғоялари билан овора бўлиб, кўчалардаги воқеликни кўрмаяпти», дея танқид қилди.
Путин Доналд Трамп ҳақида ҳам гапириб, «агар у президент бўлганида, Украинадаги урушнинг олди олинган бўларди», деди.
«Россия суверенитетига таҳдид қилган ҳар қандай уринишга тезкор жавоб қайтарилади. Биз билан ҳарбий рақобат қилишни истайсизми? Илтимос, тайёр бўлинг. Фақат бизни провокация қила кўрманг. Ҳеч қачон», — дея хулоса қилди Путин.