Франция президенти Эммануэл Макрон Европа сиёсий ҳамжамияти саммити очилишида Россия нефт экспортини йўққа чиқариш учун «хуфиёна флот» деб аталган танкерларни ушлаб қолиш таклифини билдирди. Унинг фикрича, бир неча кун ёки ҳафталик кечиктиришлар ҳам бутун бизнес-моделни издан чиқаради.
Макрон мисол сифатида кеча Франция соҳиллари яқинида тўхтатилган танкерни келтирди. Ушбу кема Россия портларидан Ҳиндистонга йўналган бўлиб, «сохта байроқ» остида ҳаракатланаётгани маълум қилинди. «Бу чоралар шу кемалар халқаро қоидаларга мос келадими-йўқми, шуни текшириш учун зарур», — деди Франция раҳбари.
Кремль эса бу воқеага кескин муносабат билдирди. Россия президенти матбуот котиби Дмитрий Песковнинг сўзларига кўра, Москва ушбу танкердаги нефт келиб чиқиши ҳақида маълумотга эга эмас. У Франция ҳаракатларини «аксилроссиячилик жазавасининг давоми» деб атади.
Шу билан бирга, Европа мамлакатлари ўртасида турли қарашлар ҳам намоён бўлмоқда. Масалан, Полша президенти Владимир Зеленскийнинг Болтиқ денгизини Россия «хуфиёна флоти» учун ёпиш ҳақидаги чақириқларини рад этди. Карол Навроцкий бу таклифни қабул қилмаслигини, чунки мамлакат сиёсати фақат Украина раҳбарининг сўзларига асосланмаслигини таъкидлади.
Экспертлар фикрича, Макрон ташаббуси Европа Иттифоқининг нефт санкцияларини кучайтиришга қаратилган бўлиб, Россиянинг глобал энергетика бозоридаги имкониятларини янада чеклашни кўзлайди.