«Ўзатом» раҳбари Азим Аҳмадхўжаевнинг таъкидлашича, Жиззах аҳолиси АЭС қурилишини қўллаб-қувватламоқда ва ишларнинг бошланишини интизор кутмоқда. Бу ҳақда у Москвада бўлиб ўтган World Atomic Week форумида сўз очди, дея ёзмоқда Газета.uz.
«Маҳаллий аҳолимиз: „Қачон? Қачон бошлайсизлар?“ деб сўраяпти. Улар ишнинг бошланишига ҳар томонлама кўмаклашмоқда, оқсоқоллар қурилиш майдонига келиб, қизиқишмоқда. Нима учун? Чунки улар бу лойиҳа кўп қиррали таъсирга эга эканлигини ва нафақат минтақага, балки бутун вилоятга барча йўналишларда ривожланиш олиб келишини тушунишади», – деган Азим Аҳмадхўжаев. Унинг сўзларидан Газета.uz иқтибос келтирди.
Унинг таъкидлашича, станция бошқа соҳаларни ривожлантириш учун «триггер» бўлади.
«Одамлар бу станцияга хизмат кўрсатиш учун улкан маиший хизмат кластерини яратиш кераклигини тушунишади. Масалан, ижтимоий, инфратузилма объектлари қурилади. Вилоятда ҳаёт сифати каррасига ошади», – деган у.
Унинг таъкидлашича, одамлар шу билан бирга ўз ватанларида қолишни хоҳлашади.
«Биз уларнинг ҳеч қаерга кетишни истамаслигига қатъий ишончни кўрмоқдамиз. Улар бу тараққиётнинг иштирокчиси ва бу йўналишда пешқадам бўлишни истайдилар. Улар ўз мисолида бошқа ҳудудларга ҳам аслида яхши, юқори маданият даражасида яшаш мумкинлигини кўрсатишлари, шу билан бирга бунёдкорлик жараёнларида иштирок этишлари ва минтақа ривожланиш тарихининг бир қисми бўлишлари мумкин», – деган «Ўзатом» раҳбари.
Ўзбекистонда катта қувватли атом электр станциясида биринчи энергоблок 2033 йилда, иккинчиси эса 2035 йилда ишга туширилади. Шунингдек, 2029 йилда Жиззах вилоятида кичик АЭСнинг биринчи энергоблокини ишга тушириш режалаштирилган, орадан яна ярим йил ўтиб иккинчи блок ҳам фаолият бошлайди.
Расмийлар аҳолининг ижобий кайфиятини қайд этаётган бир пайтда, жамоатчиликда катта қисми, айниқса иқтисодчилар ва экологлар, бундай лойиҳанинг шаффофлиги ва ҳақиқий иқтисодий самарасига ишонмаяпти.
«АЭС қурилишини «электр арзон бўлади» деган важ билан хаспўшлашмоқда. Қандай қилиб, газ, қуёш, шамол ва сувдаги аналогларидан каррасига қиммат (лойиҳа қиймати шиширилмаганда ҳам) АЭС электр энергияси (8-12 цент) нархни арзон қилади, аниқлик киритилмаган. Техник-иқтисодий асосларда таннархи ўзи қанча бўлади, энергожаноб, дея савол бермаган мухбир. Билмадим. Ё ўзбекистонликларнинг хотираси калта, деб ўйлашади ёки бир марталик матоҳдек энергоёлғонларни яна қайта ишлатса бўлаверади, деб ҳисоблашади», – дея ёзган иқтисодчи-блогер Отабек Бакиров.