Украинага қарши урушда Россиянинг тасдиқланган йўқотишлари камида 134 125 нафарни ташкил этди. Бу ҳақда BBC ва «Медиазона» хабар берди. Текширувчилар маълумотларни очиқ манбалар, маҳаллий оммавий ахборот воситалари ва волонтёрлар ёрдамида аниқлаган. Фақатгина 19 сентябрдан 3 октябргача фронтда 1008 нафар россиялик аскар ҳалок бўлгани қайд этилди.
Маълумотларга кўра, энг кўп йўқотиш Бошқирдистон (6707 киши) ва Татаристонда (6029 киши) кузатилмоқда. Журналистлар таъкидлашича, 2023 йил октябридан бери Россиянинг кунлик йўқотишлари 120 нафардан камаймаган.
Таҳлилларга кўра, ҳалок бўлганларнинг 54 фоизи уруш бошлангунга қадар ҳарбий хизмат билан боғлиқ бўлмаган шахслардир. Улар орасида кўпчилигини мобилизация қилинганлар, зиндонидан жалб этилганлар ва ихтиёрий контракт тузганлар ташкил қилади. Ҳозирда фронтда ҳалок бўлаётганларнинг қарийб учдан бир қисми (29 фоизи) — уруш бошлангандан сўнг контракт тузган ихтиёрийлар. 2023 йилда бу кўрсаткич 14 фоиздан ошмаган эди.
Шунингдек, қамоқхоналардан урушга жалб этилган маҳбуслар йўқотишларда иккинчи ўринда (14 фоиз) турибди. Мобилизация қилинганлар эса 11 фоизни ташкил этади. Шу билан бирга, журналистлар бу кўрсаткич ҳам пасайтириб кўрсатилиши мумкинлигини таъкидламоқда, чунки кўп некрологларда ҳарбий мақоми ёзилмаган. Уруш бошлангандан бери 5847 нафар рус офицерининг, жумладан, 150 полковник ва 12 генералнинг ҳалок бўлгани маълум.
Таҳлилчилар ҳақиқий йўқотишлар анча кўпроқ эканини таъкидлайди. Уларга кўра, оммавий ахборотда қайд этилган қурбонлар умумий рақамнинг 45–65 фоизинигина ташкил этади. Демак, Россияда уруш қурбонлари сони 206 мингдан 298 минг нафаргача етиши мумкин.
Шунингдек, Россия 2022 йилдан бери маълумот бермай қўйган «ДНР» ва «ЛНР» қурбонларини ҳисобга олганда, умумий йўқотишлар 227 мингдан 322 минг нафаргача етиши эҳтимол қилинмоқда.