Европарламентнинг саноат қўмитаси 16 октябр куни RePowerEU регламентига ўзгартиришлар киритиш масаласида овоз беришни режалаштирмоқда. Бу ташаббуснинг асосий мақсади — Европа Иттифоқининг Россия энергия манбаларига қарамлигини қисқартиришдир. Bloomberg манбаларининг хабар беришича, ўзгартиришлар қабул қилинса, 2026 йил январиданоқ Россия нефт ва нефт маҳсулотлари импорти бутунлай тўхтатилиши мумкин.
Бундан ташқари, 2027 йилдан бошлаб Россиядан газ харид қилиш ҳам тўлиқ чекланиши назарда тутилмоқда. Илк режа бўйича эса ЕИ фақат 2027 йил охирига қадар Россия хомашёсидан воз кечиши керак эди.
Таклифга кўра, қисқа муддатли шартномалар 2026 йил 15 июнига қадар, узоқ муддатли келишувлар эса 2027 йил 1 январига қадар амалда қолади. Шу билан бирга, агар Венгрия ва Словакияга «Дружба» қувури орқали олиб кирилаётган Россия нефт етказиб бериш тўхтатилмаса, унга қўшимча божлар жорий этилиши мумкин.
Европа комиссияси бу чора орқали қувур орқали газ етказиб беришни ҳам денгиз орқали йўлга қўйилган нефт таъминоти билан бир вақтда чеклашни мақсад қилмоқда. Бу ЕИнинг Москвага қарши санкциялар пакетида алоҳида қайд этилган эди.
Bloomberg таҳлилчилари таъкидлашича, 2026 йил иккинчи ярмидан жаҳон бозорида газ профицити юзага келиши кутилмоқда. Бу эса ЕИнинг Россиядан босқичма-босқич воз кечиш жараёнида нархларнинг кескин ошиб кетиши хавфини камайтиради ва сиёсий қўллаб-қувватлашни кучайтиради.
Европа комиссияси раҳбари Урсула фон дер Ляйен 17 сентябрда АҚШ президенти Доналд Трамп билан суҳбатдан сўнг ЕИ Россиядан энергия хомашёсидан воз кечиш жараёнини тезлаштириш ниятини билдирган эди. Шунингдек, АҚШ энергетика вазири Крис Райт ЕИнинг газ импортни 6–12 ойда АҚШдан олинадиган СТГ билан алмаштириши мумкинлигини таъкидлаган.