2024 йилда АҚШда 1,2 миллиондан ортиқ электр автомобил сотилган — бу тўрт йил аввалги кўрсаткичдан беш баравар кўп. Аммо сентябр ойида амал қилишни тўхтатган 7,5 минг долларлик давлат субсидияси тугагач, бозорда пасайиш кутилмоқда. General Motors ва Ford каби йирик ишлаб чиқарувчилар талаб кескин камайишини олдиндан маълум қилишган.
Буюк Британия ва Европа давлатларида электр ва гибрид автомобиллар янги сотувларнинг 20–30 фоизини ташкил этса, Хитойда бу кўрсаткич қарийб 50 фоизга етган. АҚШ эса дунёдаги иккинчи йирик авто бозор бўлишига қарамай, бу йўналишда суст қадам ташламоқда.
Собиқ президент Жо Байден электромобиллар улушини 2030 йилгача барча сотувларнинг ярмига етказишни мақсад қилган эди. У ҳукумат харидлари орқали талабни ошириш, қувватлантириш станцияларини қуриш ва ишлаб чиқарувчиларга кредитлар бериш каби чоралар кўрган. Бироқ Доналд Трамп бу ташаббусларни бекор қилиб, бозор эркинлигини асос қилиб оладиган янги сиёсатни жорий этмоқда.
АҚШда электр автомобиллар ҳали ҳам анъанавий бензинли машиналарга нисбатан қиммат: ўртача нарх 57 минг доллар бўлиб, бу бошқа моделлардан 16 фоизга юқори. Хитойнинг BYD каби арзон ишлаб чиқарувчилари эса мамлакатга кириш имконига эга эмас — чунки уларга катта бож ставкалари қўлланилган.
Муттахассислар фикрича, субсидиялар бекор қилиниши ва божларнинг ошиши АҚШда электр автомобил ишлаб чиқариш ва сотувини сезиларли сустлаштиради. S&P Global Mobility таҳлилчиси Стефани Бринли бу вазиятни «2026 йилда 2 фоизлик умумий сотув пасайишига олиб келиши мумкин» деб баҳолаган.