«Барселона» президенти Жоан Лапорта Парижда «ПСЖ»га қарши мағлубиятдан сўнг жамоадаги асосий муаммони аниқлаганини айтди. Унинг фикрича, жамоа самарали ҳужумчига муҳтож. Роберт Левандовскининг ёши ва формаси пасайганини ҳисобга олганда, жамоада доимий гол урадиган футболчи йўқ.
Лапорта шундай ҳолатда янги ҳужумчи олиб келишни жуда муҳим деб ҳисобламоқда. Унинг асосий орзуси — «Манчестер Сити» юлдузи Эрлинг Ҳоландни Каталонияга олиб келиш. Аввал бу ҳаракат амалга ошмаган, чунки клуб молиявий қийинчиликка дуч келган эди. Аммо ҳозирда Лапорта имкониятлар анча яхшиланганини таъкидламоқда.
«Сити»даги сўнгги натижалар инқирози ва мураббий Пеп Гвардиоланинг мавсум якунлангач кетиш эҳтимоли фонида норвегиялик ҳужумчининг «Барса»га кўчиши имконияти ошмоқда. Ҳоланднинг ўзи ҳам бир неча марта Англия Премиер-лигасидан ташқарида ўз кучини синаб кўриш нияти борлигини айтган. У учун Испаниянинг La Liga EA Sports чемпионати жуда қизиқ туюларкан.
Лапорта режасига кўра, «Барселона» Ҳоланд учун 125 млн евро таклиф этиши мумкин. Бу маблағни тўплаш учун клуб икки муҳим трансфер амалга ошириши керак бўлади. Биринчи навбатда ҳимоячи Роналд Араухо сотилиши мумкин, чунки у сўнгги мавсумларда ўз қийматини сезиларли оширди. Иккинчи сотув эҳтимоли эса Фермин Лопес ёки Дани Олмога тегишли бўлиши мумкин, деб ёзади Каталониянинг El Nacional нашри.
Лапорта бу орқали жамоани қайта қуриш ва Европадаги етакчи мақомини тиклашни мақсад қилмоқда. Унинг сўзларига кўра, «Барса»нинг янги босқичи Ҳоланд каби юлдуз билан бошланиши керак.