Ўзбекистоннинг эркаклар бокс бўйича терма жамоаси Азербойжонда ўтган Мустақил Давлатлар Ҳамдўстлиги (МДҲ) ўйинларида жами 10 та медал — 5 та олтин ва 5 та кумуш медални қўлга киритди. Бу натижа терма жамоа учун мусобақанинг энг муваффақиятли якунларидан бири бўлди.
Олтин медал соҳиблари қуйидагилар бўлди: Беҳруз Роҳаталиев (–54 кг) қирғизистонлик Эрбол Баратахунов устидан 5:0 ҳисобида ишончли ғалаба қозонди. Бобомурод Боймирзаев (–57 кг) эса рақиби рингга чиқишдан бош тортгани сабабли олтин медални қўлга киритди. Дилшод Аҳмаджонов (–63 кг) россиялик Давид Карабабаевни 3:2 ҳисоби билан енгди. Ойбекжон Абдураҳимов (–70 кг) Россия вакили Альберт Кобзевни 5:0 ҳисобида мағлуб этди. Хуршидбек Жўраев (–75 кг) финалда россиялик Роман Запорожец устидан 4:1 ҳисобида ғалаба қозонди.
Кумуш медал эгалари эса қуйидагича: Ўткирбек Норкосимов (–46 кг) озарбойжонлик Қардаш Раҳимовга 2:3 ҳисобида ютқазди. Азизбек Шокиржонов (–50 кг) Тожикистон вакили Беҳруз Умаровга қарши жангда 0:5 ҳисобида мағлуб бўлди. Отбек Нурмуҳаммадов (–60 кг) озарбойжонлик Шоҳин Аслановга 1:4 ҳисобида имкониятни бой берди. Камронбек Ҳамдамов (–66 кг) россиялик Максим Соболевга қарши кескин беллашувда 2:3 ҳисобида ютқазди.
Шунингдек, оғир вазн тоифасида (+80 кг) Фарҳоджон Баҳодиров ҳам финалга чиқди, аммо озарбойжонлик Сафар Маммадзодага қарши жангда 1:4 ҳисобида мағлуб бўлди.
Ўзбекистон спортчилари 20 та олтин, 27 та кумуш ва 47 та бронза — жами 94 та медал билан умумжамоа ҳисобида 4-ўринда боришмоқда.
