Миллий статистика қўмитаси маълумотларига кўра, январ–август ойларида Ўзбекистон 11 та давлатдан жами 490,8 минг тонна картошка импорт қилган. Бу кўрсаткичнинг қиймати 49,7 млн долларни ташкил этган. Импорт ҳажми ўтган йилнинг шу даврига нисбатан 9,1 фоизга ёки 41 минг тоннага кўп.
Энг кўп етказиб берувчи давлат сифатида Покистон биринчи ўринни эгаллади — мамлакатдан 299,4 минг тонна картошка келтирилган. Бу жами импортнинг қарийб учдан икки қисмига тенг.
Қозоғистондан 110 минг тонна, Афғонистондан 34,8 минг тонна, Қирғизистондан 18,1 минг тонна ва Россиядан 15,4 минг тонна картошка олиб келинган. Қолган 13,1 минг тонна маҳсулот эса бошқа давлатлар ҳиссасига тўғри келган.
Статистик маълумотлар Ўзбекистон ички бозорида картошка маҳсулотига бўлган талаб юқори даражада сақланаётганини кўрсатади. Бу эса мамлакатда қишлоқ хўжалиги ишлаб чиқаришини кенгайтириш ва захира имкониятларини ошириш заруратини яна бир бор таъкидлайди.