Жиноят ишлари бўйича Наманган шаҳар суди 11 сентябрда К.Р.га нисбатан ишни кўриб чиқди. У Ўзбекистон Жиноят кодексининг 154-моддаси 1-қисмига кўра — чет давлат ҳарбий хизматига ихтиёрий кирганликда айбдор деб топилди. Бу ҳақда UzNews суд ҳукмига таянаб хабар берди.
Маълумотларга кўра, Украинага тегишли «Хочу жит» телеграм-канали Россия—Украина урушида қатнашган 1100 нафар ўзбекистонликлар рўйхатини эълон қилган. Рўйхатнинг 392-рақамида 1970 йилда Наманганда туғилган К.Р. исми келтирилган.
У 2023 йил июн ойида Қирғизистон орқали Россияга ишлаш учун борган. У ерда фуқаролик патенти олиш мақсадида мурожаат қилганида, миграция идораси ходимлари унга патент берилмаслигини, аммо урушда иштирок этса фуқаролик олиши мумкинлигини айтган. Шунинг ортидан у Россия Мудофаа вазирлиги билан бир йиллик шартнома имзолаб, «механик-машинист» сифатида хизмат қилган. У «Дед» таҳаллуси билан танилган.
Урушда иштирок этгани учун К.Р. 700 минг рубл мукофот пули ҳамда ойига ўртача 150–200 минг рубл (25–30 млн сўм) маош олган. У Белгород шаҳридаги ҳарбий қисмида уруш техникасини таъмирлаш билан шуғулланган.
2024 йил май ойида саломатлигидаги муаммолар сабаб хизматдан озод этилган К.Р. июн ойида Ўзбекистонга қайтган. Суд уни айбдор деб топиб, 2 йиллик озодликдан маҳрум қилиш жазосини тайинлади.