Financial Times нашрининг ёзишича, АҚШ президенти Доналд Трамп маъмурияти жорий этган импорт тарифлари мамлакатдаги чакана бозорга таъсир кўрсата бошлади. Жумладан, консервалар, кийим-кечак ва автомобиль эҳтиёт қисмлари каби турли маҳсулотлар нархлари кўтарилаётгани кузатилмоқда.
Газета АҚШ Бандлик ва меҳнат статистикаси бюроси маълумотларига таяниб, 2025 йил мартдан августгача бўлган даврда аудиотехника нархлари 14 фоизга, либослар 8 фоизга, уй жиҳозлари ва қурол-асбоблар эса 5 фоизга ошганини қайд этди. Таъкидланишича, ушбу маҳсулотларнинг катта қисми АҚШга импорт қилинади.
Telsey Advisory Group таҳлил маркази маълумотларига кўра, йирик чакана савдо тармоқлари 29 та «юмшоқ линейка» маҳсулотларидан (футболка, пойафзал, кўйлак ва ҳ.к.) 11 тасининг, ҳамда 18 та «қаттиқ линейка» маҳсулотларидан (велосипед, идиш ювиш машиналари ва бошқалар) 12 тасининг нархини оширган.
«Бу ҳолат тарифларнинг бозорга таъсир қила бошлаганини ва нархларни оширишга мажбурлаётганини кўрсатмоқда», — деди Telsey компанияси таҳлилчиси Жо Фелдман.
FT таҳлилига кўра, тарифларнинг таъсири келгуси ойларда янада кучайиши мумкин, чунки АҚШдаги кўплаб ишлаб чиқарувчилар ва дистрибюторлар эски омбор захираларини тугатиб бўлмоқда. Бу эса янги импорт маҳсулотлар нархи орқали истеъмол бозорида қимматлашиш жараёнини тезлаштириши мумкин.