Россия президенти Владимир Путин Санкт-Петербургда россиялик қўмондонлар билан ўтказган йиғилишда Украинага қарши уруш бошлаш ҳақидаги қарорни «тўғри ва ўз вақтида қабул қилинган» деб атади. У Россиянинг Украина ҳудудларини босиб олишини «қайта бирлашиш куни» деб эълон қилинган 30 сентябр билан боғлади.
«Бу ҳудудлардаги аҳоли мутлақ кўпчилик овоз билан Россияга қўшилишни танлади. Бу 2022 йил февралда қабул қилинган қарорларнинг тўғри ва ўз вақтида бўлганини тасдиқлайди», — деди Путин ТАСС агентлиги келтирган баёнотида.
Путин ўз нутқида Россия «фронтнинг барча чизиқларида ҳужум ҳаракатларини давом эттираётганини» таъкидлади, аммо Украина томонини «Россия ҳудудидаги тинч объектларга зарба бермоқда» деб айблади. Шунингдек, у 2025 йил давомида Россия Украинанинг 4900 километр квадрат ҳудудини эгаллаганини маълум қилди. Бу мамлакат умумий майдонининг тахминан 0,8 фоизини ташкил этади.
Кремль раҳбари, шунингдек, Россия «махсус ҳарбий операция»нинг барча белгиланган мақсадларига етиши зарурлигини таъкидлади. Унга кўра, уруш Россия хавфсизлиги ва суверенитетини таъминлаш учун олиб борилмоқда.
Бу баёнот Путиннинг АҚШ президенти Доналд Трамп сўзларига жавоби сифатида ҳам баҳоланмоқда.
Трамп аввалроқ Россияни «қоғоз йиртқич» деб атаган эди. Путин эса буни «истеҳзо ирония билан айтилган гап бўлиши мумкин» деб изоҳлади: «Агар у шундай деган бўлса, марҳамат, бориб шу «қоғоз йиртқич» билан курашиб кўрсин. Лекин воқеалар бошқача кечаётганини кўриб турибсизлар».