Нобел қўмитаси 2025 йилги Тинчлик мукофоти соҳиби ҳақидаги қарорни Ғазо бўйича келишув тузилишидан анча олдин қабул қилган. Бу ҳақда Le Monde нашри Норвегия Нобел институти вакили Эрик Осҳайм баёнотига таяниб хабар берди.
«Сўнгги ишлар душанба куни бажарилди», — деган Осҳайм. Унинг таъкидлашича, қўмита ўз қарор санасини ҳеч қачон ошкор қилмайди ва лауреат номи эълон қилинишигача янги йиғилишлар режалаштирилмаган.
Нобел Тинчлик мукофоти соҳиби номи бугун, 10 октябр Тошкент вақти билан 14:00 да эълон қилинади.
Бунгача АҚШ президенти Доналд Трамп воситачилигида Исроил ва ҲАМАС ўртасидаги тинчлик режасининг биринчи босқичи бўйича келишув имзолангани ҳақида маълум қилинган эди.
Трамп аввалроқ ўз сўзларида шундай деган:
«Ҳамма ўзининг тинчлик учун Нобел мукофотини олиши кераклигини айтмоқда. Аммо менинг фикримча, улар уни ҳеч нарса қилмаган йигитга беришади. Бу АҚШ учун катта ҳақорат бўлади».
Трамп шунингдек, 2020 йилда АҚШнинг араб давлатлари билан Исроил ўртасидаги дипломатик муносабатларни нормаллаштиришдаги роли етарлича эътироф этилмаганини таъкидлаб, «камида еттита урушга чек қўйганини» эслатган.
Polymarket платформаси маълумотларига кўра, Нобел Тинчлик мукофотини қўлга киритиш имконияти энг юқори бўлган номзод — венесуэлалик мухолифатчи Мария Корина Мачадо (68 фоиз). Трампнинг эҳтимоли эса атиги 3 фоиз бўлган.
Демак, Нобел тинчлик мукофотини Трамп фақат 2026 йилда қўлга кирита олиши мумкин. Бунгача, Россия-Украина урушини тўхтатиш бўйича жонбозлик кўрсатса унинг мукофотга эга чиқиш эҳтимоли янада ортади.
Аввалроқ, Нобел мукофотининг физика, кимё ва адабиёт йўналишлари бўйича совриндорлари ҳақида хабар берган эдик.