Россиянинг камида 57 ҳудуди бензин ва дизел ёнилғиси билан таъминлашда жиддий қийинчиликларга дуч келди, деб ёзмоқда BBC. Муаммолар асосан мустақил ёнилғи қуйиш шохобчаларида кузатилган. Таҳлилда август ойидан буён қайд этилган барча ҳолатлар ҳисобга олинган, ҳатто баъзи ҳудудларда вазият кейинчалик барқарорлашган бўлса ҳам.
Bloomberg маълумотларига кўра, Россиядаги ҳар учинчи нефтни қайта ишлаш заводи (НҚИЗ) Украина ҳужумларидан жабр кўрган. Фақат август ойининг ўзида 14 та, сентябрда — 8 та, октябрнинг илк 10 кунида яна 4 та дрон ҳужуми қайд этилган. Reuters, Bloomberg ва S&P Global Commodity Insights таҳлилларига кўра, камида 10 та йирик корхона, жумладан экспортга мўлжалланганлари ҳам, август–сентябр ойларида қисман ёки тўлиқ тўхтатилган. BBCʼнинг ҳисоблашича, йил бошидан буён Украина дронлари 38 та энг йирик НҚИЗнинг 21 тасига зарба берган — бу ўтган йилги кўрсаткичдан 48 фоизга кўп.
Reuters агентлигининг ёзишича, август ойида Россия НҚИЗларидаги ишлаб чиқариш қуввати 23 фоизгача қисқарган — бу тарихдаги энг юқори даража бўлган. Сентябрда бу кўрсаткич яна ошган. Bloomberg маълумотига кўра, октябрда нефть қайта ишлаш ҳажми суткасига 4,86 млн баррелгача тушиб, июлга нисбатан қарийб 10 фоизга камайган ва сўнгги беш йилдаги энг паст кўрсаткичга айланган.
Берлин Карнеги маркази таҳлилчиси Сергей Вакуленконинг таъкидлашича, НҚИЗлардаги ишлаб чиқариш ҳозирча икки–уч ҳафта ичида тикланиши мумкин, аммо кейинги вазият Украина ҳужумларининг давомийлиги ва миқёсига боғлиқ бўлади.
«Украина қанча дрон ишлаб чиқара олади ва уларни қай даражада кўп миқдорда қўллайди — шу ҳолат Россиянинг ёқилғи бозори келажагини белгилайди», — дейди эксперт.
Ёқилғи қайта ишлаш ҳажмининг қисқариши ва бензин нархининг 14 йиллик рекордга чиқиши ортидан айрим ҳудудларда, жумладан аннексия қилинган Қримда, фуқароларга ёқилғи сотишга чекловлар жорий қилинди.
Кризисни юмшатиш учун Россия ҳукумати бензин ва дизель экспорт қилинишини вақтинча тақиқлади ва бошқа давлатлардан импорт бошлашга тайёргарлик кўрмоқда, деб ёзади «Коммерсант».