Россиянинг Владивосток шаҳрида автомобилларга утилизация йиғимининг оширилишига қарши йирик норозилик намойиши бўлиб ўтди.
Акция шаҳарнинг Ёшлар уйи олдида ўтказилиб, ўтган йиллардаги энг оммавий норозилик намойишларидан бири бўлди. Ҳудуд полиция томонидан тўлиқ ўраб олинган, металл детектор рамкалари ўрнатилган ва иштирокчилар батафсил текширувдан ўтказилганига қарамай, митингга 500 дан ортиқ киши йиғилди.
Норозилар «Ҳукумат, одамлар ҳақида ўйла, йиғим ҳақида эмас!», «Мен ватанпарварман, лекин аҳмоқ эмасман!», «Утил бор, заводлар қаерда?», «Аввало йўллар, кейин йиғимлар!» каби ёзувлар билан чиқишди. Намойишчилар ҳукуматни автосаноатни ривожлантиришдаги мутлақо омадсизликда айблади.
«Утилизация йиғими 15 йил аввал жорий қилинган. Агар автопромни қўллаб-қувватлаш ният бўлса, шунча вақт ичида рақобатбардош автомобил яратиш мумкин эди. Лекин улар яна харажатни халқ елкасига юкламоқда», — деди митинг иштирокчиларидан бири.
Акцияда иштирок этган фаоллар Бош вазир Михаил Мишустинга йиғимни бекор қилиш ҳақида мурожаат йўллаш учун имзо тўплашни бошладилар. Намойишни РФКП депутатлари Александр Сустов ва Олег Григорйев ташкил этган.
Аввалги аризани маҳаллий ҳокимият санитар талабларни баҳона қилиб рад этганди, аммо фаоллар бюрократик тўсиқни айланиб ўтиб, 498 иштирокчига мўлжалланган иккинчи ариза орқали рухсат олдилар.
1 ноябрдан бошлаб Россияда утилизация йиғимининг янги формуласи кучга киради — унда двигател қуввати солиқ ҳисоб-китобига қўшилади. Бу эса машиналар нархи кескин ошиб кетишига ва айрим моделларнинг бозордан йўқолишига олиб келиши мумкин.