АҚШ президенти Доналд Трамп мамлакат ҳукумати Boeing компаниясига нисбатан экспорт назорати жорий этиш ҳамда Хитойга самолёт эҳтиёт қисмлари етказиб беришни чеклаш имконини кўриб чиқаётганини маълум қилди. Бу ҳақда Reuters хабар бермоқда.
«Бизда жуда кўп нарса бор, шу жумладан улар учун энг муҳим бўлган — самолётлар. Хитойда кўплаб Boeing бор ва уларга эҳтиёт қисмлар ҳам керак», — деди Трамп Оқ уйда журналистларга.
Reuters маълумотларига кўра, Хитой илгари Boeing’нинг энг йирик мижозларидан бири бўлган — буюртмалар портфелида унинг улуши 25 фоизга етарди. Аммо бу кўрсаткич ҳозир 5 фоиздан ҳам камайди. Cirium таҳлил маркази маълумотларига кўра, Хитой авиакомпаниялари 1855 та Boeing самолётини ишлатмоқда, яна камида 222 та лайнер буюртма қилинган, улар асосан тор фюзелажли 737 серияси моделлари.
АҚШнинг технологик босими ортиб борган бир пайтда Хитой ўз миллий авиасаноатини ривожлантираётгани кузатилмоқда. Мамлакат COMAC C919 йўловчи самолётини ишлаб чиқаришга эътибор қаратиб, уни Airbus A320 ва Boeing 737’га рақобатчи сифатида кўрмоқда. Cirium маълумотларига кўра, хитойлик мижозлар бу моделдан 365 та самолётга буюртма берган. Бироқ ишлаб чиқариш АҚШнинг экспорт чекловлари сабаб секин кечмоқда: COMAC 2025 йилда етказиб бериши керак бўлган 32 самолётдан ҳозирча фақат 5 тасини топширган.
Вашингтон ва Пекин ўртасидаги янги савдо кескинлиги Хитой нодир металллар экспортини чеклагандан кейин бошланди. Бу металллар АҚШнинг юқори технологияли саноати учун муҳим саналади. Бундан кейин Трамп Жанубий Кореяда ўтадиган AТЭС саммитида Си Жинпинг билан режалаштирилган учрашувни бекор қилди ва «бундай мулоқот учун энди асос йўқ» дея баёнот берди.
Шунингдек, АҚШ президенти Хитой маҳсулотларига 1 ноябрдан бошлаб қўшимча 100 фоизлик бож жорий этишини, натижада умумий тариф даражаси 130 фоизгача ошишини билдирди. Трампнинг сўзларига кўра, Вашингтон яқин вақтда «стратегик аҳамиятга эга дастурий таъминот» экспортига ҳам чекловлар жорий этишни режалаштирмоқда.