Time журнали 2025 йилнинг энг яхши ихтиролари рўйхатини эълон қилди. Таҳририят мутахассислари юзлаб янгиликларни таҳлил қилиб, 30дан ортиқ йўналишда 300га яқин ихтирони саралаб олди. Танловнинг мақсади — жаҳон илмий-техник тараққиётида энг катта таъсир кўрсатган, инсон ҳаётини енгиллаштирган ва янги имкониятлар яратган қурилмаларни аниқлашдир.
«Робототехника» тоифасида Figure 03 уй хизмати учун мўлжалланган робот ва HoverAir X1 ProMax дрони йилнинг энг илғор ишланмалари сифатида қайд этилди. Улар автоном бошқарув, юқори аниқлик ва янги сунъий интеллект имкониятлари билан ажралиб туради.
Коинот соҳасида AST SpaceMobile’нинг BlueBird интернет узатиш тизими ҳамда Вера Рубин номидаги замонавий обсерватория инновация намунаси сифатида танланди. Бу ишланмалар алоқа ва астрономия соҳасида янги босқични бошлаб бериши таъкидланди.
Истеъмол электроникаси бўйича Apple AirPods Pro 3 қулоқчинлари, Huawei Pura 80 Ultra камерофони, Samsung Micro RGB телевизори, Tecno Megabook S14 ноутбуки ва Fujifilm Instax Wide Evo фотокамераси йилнинг энг яхши гаджетлари деб топилди. Шу билан бирга, 70mai Dash Cam 4K Omni видеорегистратори ва Biwin микро-SSD диск ҳам юқори баҳоланди.
Соғлом турмуш технологиялари бўйича Oura Ring 4 «ақлли» узуги ҳамда Garmin Index Sleep Monitor уйқу назорат тизими танловнинг етакчилари бўлди. Транспорт соҳасида эса BMW iX3 ва BYD Seagull электромобиллари экология ва самарадорликни бирлаштирган моделлар сифатида қайд этилди.