АҚШ президенти Доналд Трамп Исроилга ташрифи чоғида бош вазир Бенямин Нетаняҳу ва унинг рафиқаси Сарани зирҳли лимузинига таклиф қилиб, дипломатик протоколни бузди. Бу ҳақда The Times of Israel ёзмоқда.
Бен-Гурион аэропортига етиб келган Трамп қизи Иванка ва унинг эри Жаред Кушнер, шунингдек, ўтган ҳафта Исроилга келган махсус элчи Стив Виткоффни кутиб олди. Кейин у Исроил раҳбарларига мурожаат қилиб, «Бу ажойиб кун. Балки сиз учун энг яхши кундир», – деди.
Қисқа маросимдан сўнг АҚШ президенти Нетаняҳу ва унинг рафиқаси биргаликда Кнессетга йўл олишди, гарчи протоколга кўра, Исроил ҳукумати раҳбари алоҳида машинада бориши керак эди.
Трампнинг ташрифи Ғазо уруши тугаши ва гаровга олинганларнинг озод этилиши фонида бўлиб ўтди. АҚШ воситачилигидаги келишувга кўра, ҲАМАС 20 нафар тирик гаровга олинганларнинг ҳаммасини қайтариб берди ва бунинг эвазига Исроил 1700 дан ортиқ фаластинликни, шу жумладан маъмурий қамоққа олинганларни судсиз озод қилди. Исроил матбуотига кўра, Қизил Хоч асирларни топширишни икки босқичда ташкил қилган: аввал еттита, кейин яна ўн учта.
Трамп келган куни Тел-Авив кўчалари миннатдорлик билдирувчи баннерлар билан безатилган эди. Кнессетда Америка етакчиси уруш тугади ва бугун янги даврнинг бошланиши деб эълон қилди. У ўз нутқидан сўнг Мисрга боради ва у ерда Президент Абдел Фаттоҳ ас-Сиси билан Ғазо тинчлик келишувининг биринчи босқичи имзоланишига бағишланган халқаро саммитга мезбонлик қилади.
Шу билан бирга, Россия ташқи ишлар вазири Сергей Лавров Трампнинг режасини Фаластин давлатининг келажаги борасида «жуда ноаниқ» деб атади. Унинг сўзларига кўра, ҳужжат фақат Ғазони қамраб олади, лекин босиб олинган Ғарбий Соҳил билан нима бўлиши ҳақида аниқ жавоб бермайди.
Нетаняҳунинг ўзи парламентда сўзлаган ҳолда, Исроилнинг кампанияси «ҳали тугамаганини» ва мамлакат «ҳали ҳам жиддий хавфсизлик муаммоларига дуч келаётганини» таъкидлади.