«UzAuto Motors» компанияси «Damas» ва «Cobalt» моделларининг янги авлодини ишлаб чиқаришни бошлаганини маълум қилди. Янги сериялар жорий моделлар билан бир вақтда ишлаб чиқарилади ва харидорларга танлов имконини кенгайтиради.
Маълумотларга кўра, «Damas» минивени икки янги версияда — йўловчилар учун «Damas Move» ва юк-йўловчилар учун «Damas Max» сифатида ишлаб чиқарилади. Янги «Damas» олдинги моделга нисбатан каттароқ ўлчамга, юқори сиғим ва юк кўтариш қобилиятига эга бўлади. Ҳайдовчи ҳамда йўловчилар учун қулайлик даражаси ҳам оширилган.
«UzAuto Motors» қайд этишича, бу янгиланиш харидорларга классик «Damas» модели билан бирга технологик жиҳатдан илгарилаган янги версияни танлаш имконини беради. Янги модел айни вақтдаги «Damas» билан бирга ишлаб чиқарилади.
«Cobalt» учун ҳам модернизация жараёни амалга оширилиб, икки янги версия — «Cobalt Style MCM» ва «Cobalt Midnight MCM» тақдим этилади. Уларда илгари мавжуд бўлмаган 12 та янги функция жорий қилинган. Автомобил двигатели янгиланган, ABS тизими такомиллаштирилган ва бошқарув блоки замонавий тизимга алмаштирилган.
Шунингдек, янги «Cobalt» моделлари Android Auto ва Apple CarPlay қўллаб-қувватловчи сенсорли мультимедиа тизими, круиз-контроль, эко-чармдан тайёрланган иситиладиган ўриндиқлар, янги асбоблар панели ва руль тугмалари билан жиҳозланади. Компания маълумотича, жами 50 дан зиёд асосий компонентлар янгиланган.
«UzAuto Motors» вакиллари таъкидлашича, кейинги босқичда «Cobalt»нинг ташқи кўринишида фейслифт янгиланиши ҳам режалаштирилган. Янги моделларнинг нархлари ва сотув бошланиши ҳақидаги маълумотлар кейинроқ эълон қилинади.
Эслатиб ўтамиз, аввалроқ Vaqt.uz янгиланган «Cobalt 2025»да қандай ўзгаришлар бўлгани ҳақида ёзган эди.