Украина президенти Володимир Зеленский АҚШ президенти Доналд Трампнинг Ғазо бўйича тинчлик режасини «тарихий ташаббус» деб атади. Бу ҳақда у Fox News телеканали эфирида сўз юритди.
Зеленскийнинг таъкидлашича, Трампнинг ташаббуси бутун дунёдаги можароларни ҳал этишда янги умид уйғотган.
«Бу режа бизга ҳам ўрнак бўлиши мумкин. Мен умид қиламанки, Трамп шу усулларни Путинга босим ўтказиш ва Украинадаги урушни тўхтатиш учун ҳам қўллайди», — деди Зеленский.
Украина раҳбари шунингдек, Трамп билан ўтган икки кунда икки марта суҳбатлашганини маълум қилди. «Биз Россия Tomahawk ракеталарини бериш эҳтимолидан қўрқаётганини кўриб-билиб турибмиз. Бу тинчлик учун иш бериши мумкин бўлган босим тури », — деди Зеленский Telegram’даги мурожаатида.
Украина президентнинг сўзларига кўра, икки давлат раҳбарлари энергетика, газ ва хавфсизлик соҳаларидаги ҳамкорликни муҳокама қилиш учун махсус ишчи гуруҳлар тузишга келишган.
Зеленский шу куни Франция президенти Эммануэл Макрон билан ҳам телефон орқали мулоқот қилганини билдирди. Улар Украина учун ҳаво мудофааси тизимлари ва мамлакатнинг барқарорлиги масалаларини муҳокама қилган. «Биз ҳарбийларимиз орқали Францияга биринчи навбатдаги эҳтиёжлар рўйхатини топширамиз. Бу етказиб беришни тезлаштиради», — деди у.
Шунингдек, суҳбатда Запорижжя атом электр станциясидаги вазият муҳокама қилинди. Зеленский таъкидлаганидек, украин мутахассислар станция хавфсизлигини таъминлай олади. «Фақат украин назорати хавфсизликнинг 100 фоиз кафолатидир», — деди у.
Украина президентига кўра, Россия бу хавфсизликни тиклашдан манфаатдор эмас ва АЭХАнинг аниқроқ позицияси зарур. Ҳозирда Запорижжя АЭС уч ҳафтадан бери генераторларда ишлаб, блэкаут ҳолатида қолмоқда.