Франциянинг собиқ президенти Николя Саркози 21 октябр куни қамоқ жазосини ўташни бошлайди. Бу ҳақда Le Figaro нашри хабар берди. 25 сентябрда суд уни сайлов кампаниясини ноқонуний молиялаштириш иши бўйича 5 йилга озодликдан маҳрум этиш ҳақида ҳукм чиқарган эди.
Маълумотларга кўра, Саркози Париждаги «Ла-Сантэ» қамоқхонасига жойлаштирилади ва у ерда яккалик камерада сақланади. Суд қарорини ижро этиш учун собиқ президентни айнан шу муассасага жойлаштириш белгиланган.
Адвокатлар айбланувчини қамоққа етказилгандан сўнг озод қилиш ҳақидаги илтимосномани топшириш ҳуқуқига эга. Агар апелляция суди мазкур илтимосни қаноатлантирса, сиёсатчи декабр ойининг охирига қадар озодликка чиқиши мумкин. Шу билан бирга, унга шартли муддатли озодлик берилиши эҳтимоли ҳам бор, чунки Саркози бу йил 70 ёшга тўлди.
Николя Саркози 2007–2012 йилларда Франция президенти лавозимида ишлаган. Унга нисбатан жиноят иши 2013 йилда қўзғатилган. Судда аниқланишича, унинг президентлик сайлов кампанияси Ливия ҳукумати томонидан ноқонуний равишда молиялаштирилган.
Саркози ўзини айбдор деб билмади ва суд ҳукмини «Франция учун ҳақорат» деб атади. Унинг ҳимоячилари ҳукмни адолатсиз, сиёсий буюртма деб баҳолаган. Сиёсатчининг иттифоқчилари эса ҳукм Франция сиёсий тизимида жиддий баҳсларни келтириб чиқарганини таъкидламоқда.