ЖССТ сайтидаги баёнотда айтилишича, COLDRIF, Respifresh TR ва ReLife номли сироплар мос равишда Sresan Pharmaceutical, Rednex Pharmaceuticals ва Shape Pharma компаниялари томонидан ишлаб чиқарилган. Ҳар учала сиропда диэтиленгликол (ДЕГ) – истеъмол қилинганда ўлимга олиб келиши мумкин бўлган заҳарли модда аниқланган. Бу ҳақда Ҳиндистоннинг дори воситалари стандартларини назорат қилиш бўйича марказий ташкилоти (CDSCO) ЖССТга октябрь ойи бошида хабар берган эди. CDSCO маълумотларига кўра, мазкур дориларни қабул қилиш болаларнинг ўлимига сабаб бўлиши мумкин. Шу боис, Ҳиндистон ҳукумати ушбу уч турдаги сироп ишлаб чиқаришни дарҳол тўхтатиш ҳақида фармойиш берди.
CDSCO Жаҳон Соғлиқни Сақлаш Ташкилотига (ЖССТ) Ҳиндистондан ҳеч қандай заҳарли дори воситалари экспорт қилинмагани ва ҳозирда ноқонуний экспорт бўйича ҳеч қандай далил мавжуд эмаслигини маълум қилди. Шунга қарамай, ЖССТ миллий назорат органларини Ҳиндистон дори-дармон бозорига нисбатан назоратни кучайтиришга, айниқса 2024 йил декабрь ойидан бошлаб, айнан ўша корхоналарда ишлаб чиқарилган ҳар қандай оғиз орқали қабул қилинадиган суюқ дори воситалари билан боғлиқ хавфларни синчковлик билан баҳолашга чақирди.
Ҳиндистоннинг Мадҳя Прадеш штатида COLDRIF, Респифреш TR ва ReLife дори воситаларини қабул қилган бир гуруҳ болаларда буйрак шикастланиши кузатилди. Камида 22 нафар бола вафот этган.