НАТО бош котиби Марк Рютте «ёлғиз ва шикастланган Россия сув ости кемасининг уйига зўрға қайтиб келаётгани» Россия ҳарбий-денгиз кучларининг илгари ўйланганидан анча заиф эканлигини кўрсатишини таъкидлади. Бу ҳақда Newsweak хабар бермоқда.
«Ёлғиз ва шикастланган Россия сув ости кемаси патрулдан сўнг уйига зўрға қайтиб келмоқда. Том Кленсининг 1984 йилдаги «Қизил Октябр ови» романига нисбатан қандай ўзгариш юз берди. Бугунги кунда бу кўпроқ яқин атрофдаги механикни қидиришга ўхшаб кетмоқда», – деди Рютте душанба куни Словения пойтахти Люблянада сўзлаган нутқида.
Москва кеманинг носозлигини инкор этмоқда.
Буюк Британия ҳарбий-денгиз флоти хабар беришича, унинг ҳарбий кемаларидан бири ва вертолёти 7 октябрдан 9 октябргача Ла-Маншнинг жануби-ғарбий чеккасидаги Франциянинг Уэссан ороли яқинида «Новороссийск» сув ости кемасининг «ҳар бир ҳаракатини» кузатиш бўйича НАТО саъй-ҳаракатларига қўшилган. Британия денгиз флоти маълумотига кўра, сув ости кемасига шатакчи кема ҳамроҳлик қилган.
Россия махсус хизматлари билан алоқадор эканлиги таъкидланаётган Россия Телеграм-канали сентябр ойи охирида «Кило» синфидаги дизел-электр сув ости кемаси «бортида жиддий техник муаммолар»га дуч келганини – ёнилғи кема трюмига оқиб тушганини хабар қилганди. ВЧК-ОГПУ канали маълумотларига кўра, экипажда махсус билим ва эҳтиёт қисмлар бўлмаган экан.
Россия Қора денгиз флоти «Новороссийск» сув ости кемасининг Франция қирғоқлари яқинида гўёки носозлик туфайли фавқулодда сув юзасига чиқиши ҳақидаги хабарларни ёлғон деб эълон қилди. Россия флоти душанба куни ТАСС давлат агентлиги орқали тарқатган баёнотида, экипаж Ўрта ер денгизида режали флотлараро ўтишни амалга оширганини маълум қилди.
НАТО Денгиз қўмондонлиги (МАРCОМ) қўмондони 9 октябрь куни сув юзасига кўтарилган сув ости кемасининг иккита суратини эълон қилиб, француз фрегатининг “Новороссийск”ни кузатаётганини хабар қилди.
«Россия кемалари Ла-Манш бўғозидан тез-тез ўта бошлади ва бизнинг Қироллик денгиз флотимиз сувларимиз ҳамда сув ости кабелларимизнинг хавфсизлигини таъминлаш учун уларнинг ҳаракатларини диққат билан кузатиб, кеча-ю кундуз фаолият олиб бормоқда», – дея сешанба куни Буюк Британия Қуролли кучлари вазири Эл Карнс маълум қилди.
Сув ости кемасига ҳамроҳлик қилган Британиянинг HMS Iron Duke кемаси қўмондони шундай фикр билдирди: «Россиянинг сув юзасига кўтарилган сув ости кемаси ҳар доим эътиборимизни жамлашга ундайди».
Рюттенинг айтишича, Россия ҳарбийлари «чўзилиб кетган» ва «Ўрта ер денгизида Россия ҳарбий-денгиз кучлари деярли қолмаган». НАТО раҳбари қўшимча қилди: «Биз Россия таҳдидини паст баҳоламаслигимиз, лекин унинг имкониятларини ҳам ортиқча баҳоламаслигимиз керак».
2014 йилда фойдаланишга топширилган «Новороссийск» Россиянинг замонавий «Калибр» денгиз қанотли ракеталарини олиб юриш қобилиятига эга. Бу ракеталар Украинага қарши урушда мунтазам равишда қўлланилмоқда.