Миллий статистика қўмитаси маълумотларига кўра, 2025 йилнинг январ–август ойларида жами 20,7 минг нафар Ўзбекистон фуқаролари таълим олиш мақсадида чет давлатларга йўл олган. Бу кўрсаткич 2024 йилнинг шу даврига нисбатан 5,1 минг нафарга ёки 24,6 фоизга камайган.
Мутахассислар бу тенденцияни бир қатор омиллар билан изоҳлашмоқда: хорижий таълим муассасаларига киришдаги талабларнинг кучайиши, айрим мамлакатларда виза тартибининг қийинлашуви ва миллий университетларда халқаро дастурлар сонининг ортиши шулар жумласидандир.
Ўзбекистон фуқаролари таълим олиш учун энг кўп ташриф буюрган давлатлар орасида қўшни Тожикистон етакчилик қилмоқда — 5 270 нафар. Кейинги ўринларда Россия (4 649 нафар) ва Қирғизистон (3 064 нафар) туради. Бу мамлакатлар географик яқинлик ва тил мослиги сабабли ўзбекистонлик ёшлар учун энг оммабоп таълим йўналишларидан ҳисобланади.
Шунингдек, Корея Республикаси (2 309 нафар) ва Туркия (1 538 нафар) ҳам талабалар учун етакчи йўналишлар сирасига киради. Қозоғистон (874 нафар), Хитой (797 нафар), Буюк Британия (567 нафар), Германия (285 нафар) ва АҚШ (256 нафар) каби мамлакатлар ҳам ўз ўрнига эга.
Экспертлар таъкидлашича, сўнгги йилларда Ўзбекистондаги олий таълим тизими халқаро стандартларга яқинлашиб, кўплаб талабалар энди мамлакат ичида замонавий ва лицензияланган таълим дастурларида таҳсил олишни афзал кўрмоқда. Бу эса хорижга чиқувчилар сонининг қисқаришига олиб келмоқда.