Мадагаскардаги ҳарбий тўнтаришнинг етакчиси, CAPSAT қуруқликдаги қўшинларининг элита бўлинмаси полковниги Микаэл Рандрианирина сайловлар ўтказилгунга қадар президент вазифасини бажарувчи сифатида фаолият юритишини маълум қилди. Бу ҳақда Associated Press (AP) хабар бермоқда.
«Қасамёд қилиш маросими шарт. Биз бу ерда камида 18 ой, максимал икки йил қоламиз», – деди у агентликка берган интервюсида.
Мадагаскар қуролли кучлари ўтган дам олиш кунлари президент Андри Ражоэлинанинг кетиши ортидан мамлакатда ҳокимиятни қўлга олганини эълон қилди, деб хабар бермоқда AP.
Агентлик билан суҳбатда Рандрианирина давлат раҳбари вазифасини Олий Конституциявий суд таклифига биноан ва президент йўқлигида ўз зиммасига олганини тушунтирди.
«Кеча биз бутун масъулият юкини ўз зиммамизга олишга мажбур бўлдик, чунки мамлакатда ҳеч нарса қолмади: на президент, на парламент юқори палатаси раҳбари, на ҳукумат», – деди у.
Аввалроқ, Рандрианирина парламент қуйи палатаси бундан мустасно, барча давлат институтлари тарқатиб юборилганини эълон қилган эди. Унинг аниқлик киритишича, 2010-йилги Конституция «бир неча марта бузилгани учун» тўхтатиб қўйилган.
Сешанба куни қуйи палата президентни импичмент қилиш учун овоз берди: 160 депутатдан 130 нафари бу қарорни ёқлаб овоз берди.
Мадагаскарда электр ва сув таъминотидаги узилишлар туфайли 22 сентябрда оммавий норозилик намойишлари бошланди. 29 сентабрда намойишлар тарқатиб юборилгач, президент ҳукуматни тарқатиб юборди.
Маҳаллий матбуотнинг ёзишича, Ражоэлина ўтган ҳафта охирида Франция ҳарбий самолётида мамлакатни тарк этган. Бунгача у парламент қуйи палатасини тарқатиб юбориш тўғрисидаги фармонни имзолаган, бу қарорга риоя қилишдан бош тортган.