Американинг Apple корпорацияси ўзининг 14 дюймли MacBook Pro ноутбукининг янгиланган версиясини тақдим қилди. Компаниянинг расмий маълумотларига кўра, янги моделнинг асосий янгилиги — сунъий интеллект (AI) операцияларини тезлаштирувчи M5 чипидир. У илгариги M4 процессорига нисбатан 3,5 баравар юқори иш унумдорлигига эга.
Apple муҳандислари таъкидлашича, бундай натижа ҳар бир ҳисоблаш ядросига ўрнатилган нейрон блокли янги авлод график тезлатгич интеграцияси орқали амалга оширилган. Бу, ўз навбатида, графика билан ишлаш тезлигини 1,6 баравар, кўп оқимли ишлаш самарадорлигини эса 20 фоизга оширган.
Янги MacBook Pro’да маълумотлар билан ишлаш ҳам анча тезлашди — хотиранинг ўтказувчанлик қобилияти 153 Гбит/с гача ошган, бу M4’даги 120 Гбит/с кўрсаткичдан анча юқори. Шунингдек, фойдаланувчилар эндиликда SSD хотирани 4 ТБ гача конфигурация қилиши мумкин — бундай имконият аввал фақат M4 Pro чипли моделларда мавжуд эди.
Apple дизайнда ўзгариш қилмаган, аммо энергия тежамкорлиги сезиларли даражада ошган — батарея хизмати 24 соатгача етади. Шу билан бирга, янги моделнинг бошланғич нархи аввалгидай 1600 доллар этиб белгиланди.
Компания маълумотларига кўра, янги MacBook Pro M5 учун олдиндан буюртмалар қабул қилиниши бошланган, расмий сотувлар эса 22 октябрдан старт олади.