АҚШ Давлат департаменти ижтимоий тармоқларда консерватив сиёсий фаол Чарли Киркнинг ўлдирилишини маъқуллаганини билдирган олти нафар хорижлик фуқаронинг визасини бекор қилди. Бу ҳақда департамент ўзининг Х саҳифасида маълум қилди.
«Президент Доналд Трамп ва Давлат котиби Марко Рубио иммиграция қонунчилигимизни амалга ошириш орқали чегараларимиз, маданиятимиз ва фуқароларимизни ҳимоя қилади. Фуқароларимизнинг ўлдирилишини нишонлашда Американинг меҳмондўстлигидан фойдаланган хорижликлар депортация қилинади», – дейилади Давлат департаменти баёнотида.
Ушбу шахслар Аргентина, Жанубий Африка, Мексика, Бразилия, Германия ва Парагвай фуқароларидир. Баёнотда, шунингдек, олти нафар хорижлик фуқаронинг ҳар бирининг баёнотларидан мисоллар келтирилиб, уларда Киркнинг ўлдирилишини маъқуллаганликлари ва марҳумни «фашист», «ирқчи» ва «ксенофоб» деб таърифлаганлар. Давлат департаменти, шунингдек, ижтимоий тармоқларда фаолга суиқасд уюштиришни қўллаб-қувватлаган ва уни оқлайдиган АҚШ визаси эгаларини аниқлашни давом эттириш ниятида эканини билдирди.
Сешанба куни эрталаб Трамп ўлимидан сўнг Киркни Президентнинг «Озодлик» медали билан тақдирлаган эди.
31 ёшли Кирк 10 сентябр куни Юта штатининг Орем шаҳридаги университетда нутқ сўзлаётганида отиб кетиб, шифохонада вафот этди. Консерватив фаол Трамп тарафдори эди. Кирк қотиллигида гумон қилинган Тайлер Жеймс Робинсон 11 сентябр оқшомида ҳибсга олинди ва унга етти моддада айблов қўйилди. Юта округи прокурори Робинсон учун ўлим жазосини талаб қилишга ваъда берди.
АҚШ Давлат департаменти 2019 йилдан бери виза учун мурожаат этувчилардан ўз аризалари бўйича ижтимоий тармоқлардаги маълумотларни баҳам кўришларини талаб қилган бўлса-да, июн ойида талаба абитуриентлар ҳукумат текшируви учун барча ижтимоий тармоқлардаги аккаунтларини очиқ қилишлари шартлиги ҳақидаги қоидани қўшиб қўйди.
Бу қарор Трамп маъмурияти даврида АҚШ бўйлаб университет ва коллежлар кампусларида Фаластин тарафдори бўлган норозилик намойишларини қўллаб-қувватлаган халқаро талабаларнинг бостирилиши ортидан амалга оширилди.
Август ойида Давлат департаменти расмийси Fox News телеканалига бу йил 6000 дан ортиқ талаба визаларини бекор қилганини айтди.
Fox News хабарига кўра, талабалар АҚШ қонунларини бузгани учун визанинг учдан икки қисми бекор қилинган, 200 дан 300 гача эса «терроризмни» қўллаб-қувватлагани ёки «ҲАМАС гуруҳи учун маблағ йиғиш каби хатти-ҳаракатлар» билан шуғуллангани учун бекор қилинган.