Bank of America ҳисоботида келтирилишича, 2026 йилда олтин нархи бир унция учун 5000 долларга, кумуш эса 65 долларга етиши мумкин. Таҳлилчиларнинг фикрича, глобал иқтисодий беқарорлик ва сармоявий талабнинг 14 фоизга ошиши бу ўсишнинг асосий драйвери бўлади.
Молия муассасаси маълумотларига кўра, келгуси йилда олтиннинг ўртача йиллик нархи 4438 доллар, кумушники эса 56,25 доллар атрофида бўлади. Бу кўрсаткичлар тарихий рекорд бўлиши кутилмоқда. Bank of America аввал ҳам олтиннинг 4000 долларгача чиқиши эҳтимолини айтган эди, энди эса прогноз янада юқори кўтарилган.
15 октябр куни олтин нархи биринчи марта унцияси учун 4200 долларга етди, бу тарихий кўрсаткич ҳисобланади. Кумуш эса 1980 йилдан бери илк бор шунчалик юқори даражага чиқди. Таҳлилчилар буни Оқ уйнинг ноанъанавий иқтисодий сиёсатлари, давлат қарзининг ўсиши ва инфляция 3 фоиз бўлган шароитда фоиз ставкаларини пасайтириш режалари билан боғлашмоқда.
Bank of America’нинг қимматбаҳо металлар бўйича бош таҳлилчиси Майкл Видмер раҳбарлигидаги гуруҳ сармоявий талабнинг 14 фоизга кўпайганини асосий омил сифатида кўрсатган. Улар, ҳатто, олтин нархи 6000 долларгача етиши мумкинлигини ҳам истисно қилмаган. «Бу қийин, аммо мумкин бўлган вазифа», дейилади ҳисоботда.
Шу билан бирга, банк қисқа муддатда бозорда консолидация хавфи сақланиб қолишини таъкидлаган. Сентябр ойида ETF орқали олтин инвестициялари ўтган йилга нисбатан 880 фоизга ошган ва умумий 14 миллиард долларга етган. Бу ҳолат бозорда қисқа муддатли пасайиш эҳтимолини кучайтиради.
Кумуш бозорида ҳам ижобий динамика кутилмоқда. Таҳлилларга кўра, кумушга бўлган умумий талаб 11 фоизга қисқариши мумкин, бироқ таклиф танқислиги нархни юқорида ушлаб туради. Шу билан бирга, қуёш энергияси соҳасидаги ўзгаришлар кумуш нархига таъсир кўрсатиши мумкин. Қуёш панелларида ишлатиладиган кумуш сарфи 2026 йилда рекорд даражага чиқиши прогноз қилинган.